وه‌زیرێ باژێرڤانى و گوشتوگوزارێ ساسان عه‌ونى راگه‌هاند، حكومه‌تا هه‌رێما كوردستانێ دماوێ كابینه‌یا نه‌هێدا ژ چارچووڤێ گرنگیدان ب ئاڤ و ئاڤرێژ و پاقژكرن و چاره‌سه‌ركرنا گلێشى ل سێكته‌رێ باژێرڤانییێ، گرنگییه‌كا مه‌زن ب بابه‌تێ قێركرن و كۆنكریتكرنا جادده و كولانان دایه.
دیارژى كر، پرۆسه‌یا قێركرن و كۆنكریت و تێكه‌لكرنێ، به‌شه‌كێ بنه‌ره‌ت یێ سێكته‌رێ باژێرڤانییێ دناڤ وه‌زاره‌تا باژێرڤانى و گه‌شتوگوزارێدایه، و به‌رده‌وام كۆلان و جادده دهێنه نووژه‌نكرن، ل ده‌مێ كه‌ره‌نتیكرنا په‌تایا كۆرۆنایێ فه‌رمانگه‌هێن سه‌ر ب وه‌زاره‌تا باژێرڤانى و گه‌شتوگوزارێڤه ده‌رفه‌ته‌كا باش بۆ خوه دیت و ئه‌و جادده و كۆلانێن گه‌له‌ك قه‌ره‌بالغ لێ هه‌یى نووژه‌نكرن.
ساسان عه‌ونى ئه‌وژى ئاشكراكر، ل ده‌مێ كابینه‌یا نه‌هێ، ژ سه‌رجه‌مێ هه‌ردوو جۆرێن ستابلایزه‌ر و باینده‌ر زێده‌تر ژ 9 ملیۆن مه‌ترێن دووجا ل سه‌رانسه‌رى كوردستانێ هاتینه قێركرن و خۆشبه‌ختانه رێژه‌یا پتر یا ئه‌وان ده‌ڤه‌ران بوو، ئه‌وێن هه‌تا نوكه خزمه‌تگوزارییێن جادده و كۆنكرێتییان پێ نه‌گه‌هشتینه.
وه‌زیرێ باژێرڤانى و گه‌شتوگوزارێ دووپاتى ل ئه‌وێ چه‌ندێ ژى كر، هه‌ر دماوێ ئه‌ڤێ كابینه‌یێ دا ژبلى قێركرنێ، زێده‌تر ژ ئێك ملیۆن و 600 هزار مه‌ترێن دووجا یێن كۆنكریت و زێده‌تر ژ چار ملیۆن و 300 هزار مه‌ترێن تێكه‌له‌ى هاتینه تمامكرن.
