محەمەدێ حاجی مەحمود، سەرۆكێ پارتا سۆسیال دیمۆكراتا كوردستانێ ل دۆر بەردەوامبوونا تەعریبێ ل دەڤەرێن كوردستانی و رەوشا خانەقینێ و مەترسییێن سەر وەلاتییێن كورد، پەیامەك ئاراستەی حكومەتا هەرێما كوردستانێ و وەزارەتا پێشمەرگەی كر.
دەقێ پەیاما محەمەد حاجی مەحموود:
بەرێز وەزارەتا پێشمەرگەی یا حكومەتا هەرێما كوردستانێ
بەرێزان.. حكومەتا عیراقێ سەرەرای رەوشا خراب و بێ سەروبەر و نەمانا شیرازا وێ وەكۆ دەولەت كۆ نێزیكە سالەك دێ دەربازبیت هەلبژارتنێن پەرلەمانێ عیراقێ هاتینەكرن بەلێ هەتا نوكە نەشیایە حكومەتێ پێك بینیت.
د رەوشا وان یا خراب ژی دا هێشتا كوردستان ژ بیرا وان نەچوویە، وەزیرێ پەترۆلێ و دادگەهێن وان یێن رەزیل هەر رۆژ گەفەكێ دكەن و كێشەیان بۆ هەرێمێ درۆست دكەن.
ل دەڤەرێن ڤەقەتییای ژی كوردان ل سەر مۆلك و مالێن باب و باپیرێن وان دەردكەن لگەل هندێ كو مری و گورستانێن كوردان ل وان دەڤەران ژ زیندییێن نەتەوێن دی پترن. نوكە ئەو پالەوانە هاتینە باژێرێ خانەقین و سیاسەتا ب عەرەبكرنێ ل دژی كوردان ئەنجام ددەن.
” رێكێ نادەین بیانی پۆستالا خوە یا رەش ل خانەقینا خوەشتڤی بنەجهـ بكەن. “
سۆپایێ عیراقێ ل شەرێ عەرەب و ئسرائیلێ ب دیل هاتینە گرتن یان رەڤینە، ل شەرێ ئیرانێ و عیراقێ سەدان هزار ژ سۆپایێ عیراقێ ب دیل هاتنەگرتن، ل شەرێ كوێتێ هزارەهان ب دیل هاتنەگرتن و نوكە خوە ل سەر خەلكێ بێ چەك یێ كورد تاقی دكەن.
ئەگەر حكومەتێ ئلتیزام هەیە و نەشێت هێزێ بكاربینیت، داخوازێ ژێ دكەین رێكێ ب پارتا سۆیالست بدەن ل دەمێ چەند دەمژمێرەكان دێ گەهینە خانەقین، باژێرێ خەبات و شەهیدان و خوەراگر و رێكێ نادەین بیانی پۆستالا خوە یا رەش ل خانەقینا خوەشتڤی بنەجهـ بكەن.
