چاڤدێرەک: خیانەتا ١٦ی ئۆکتۆبەرێ ب ئاشکرایی ھاتبوو ئیمزا کرن

ئاژانسا خانی ، تایبەت:

ئەڤرۆ پێنج سال ل سەر خیانەتا ١٦ی ئۆکتۆبەرێ دەرباز بوون و چاڤدێرەکێ سیاسی ژی دیار کر، رێکكەفتنا خیانەتا ١٦ی ئۆکتۆبەرێ ب ئاشکرا ھاتبوو ئیمزا کرن، بەلێ پیلانێ سەر نەگرت و پێشمەرگەیی ھێرشێن حه‌شدا شه‌عبی بۆسەر ھەرێما کوردستانێ تێكشكاندن .

ئارتین جەلال بەگ، چاڤدێره‌كێ سیاسییه‌ بۆ ئاژانسا خانی دیار کر” بڕیارا خیانەتا ١٦ی ئۆکتۆبەرێ ب ئاشکرا ژلایێ سێ سەرکردێن ئێکەتییێ ھاتبوو کرن و رێکكەفتن ل ٩ خالان پێکھاتبوو دناڤبەرا سەرکردێن ئێکەتییێ و ھادی عامری سەرۆکێ دەستەیا حەشدا شەعبی، ھەروەسا باڤل تالەبانی سەرۆکێ ئێکەتییێ دانپێدان ب خیانەتێ کرییە و ئاشکرا کرییە كو ٣٨ ئەندامێن سەرکرداتییا ئێکەتییێ ژی ئیمزا ل سەر کرییە، لدووڤ وێ رێکكەفتنێ سۆز ب ئێکەتییێ ھاتبوودان پشتی رادەستکرنا دەڤەرێن کوردستانی دێ ھێرشی سەر ھەولێرێ ھێتە کرن و ھەرێما کوردستانێ رادەستی ئێکەتییێ کەن.

ئارتین جەلال بەگ گوت ژی” بەلێ پیلانا ژناڤبرنا ھەرێما کوردستانێ سەر نەگرت و پێشمەرگەیی ل چەندین بەرەیێن بەڕەڤانییێ وەک سحێلا و پردێ و مەحموودییێ بەرسینگێ ھێرشێن عێراقێ گرتن و ھاتنە شکاندن، ژ ئەنجامێ ڤێ خیانەتا دیرۆکی زیانێن زۆر ب ھەرێما کوردستانێ کەفتن، ژبەرکو پشکەکا ئاخا کوردستانێ ھاتە داگیر کرن و چو دەستکەفت ژی بۆ خیانەتکاران نەبوون.