<h3 style="text-align: justify;"><span style="font-size: 18pt;">وه‌زاره‌تا كاره‌بێ یا حكومه‌تا هه‌رێما كوردستانێ راگه‌هاند، رێژه‌یا دانانا سیسته‌مێ پریپه‌ید ل پارێزگه‌ها دهۆكێ گه‌هشته 90%ێ و بریاره ل هه‌موو پارێزگه‌هێن هه‌رێما كوردستانێ سیسته‌م بهێته دانان، ئاماژه ب هندێ ژى دا، سیسته‌مى دێ كارتێكرنه‌كا ئێكسه‌ر ل سه‌ر زێده‌بوونا كاره‌با نیشتمانى هه‌بیت و هه‌داردانا كاره‌بێ ژلایێ وه‌لاتیانڤه دێ كێمتر لێهێت.</span></h3> <h3 style="text-align: justify;"><span style="font-size: 18pt;">ئه‌ڤرۆ 22ى چریا ئێكێ یا سالا 2022ێ وه‌زاره‌تا حكومه‌تا هه‌رێما كوردستانێ دراگه‌هاندنه‌كێدا ئاماژه ب هندێ دا، رێژه‌یا دانانا سیسته‌مێ سمارت میته‌رز یێ كاره‌بێ كو دبێژنێ پیڤه‌رێ زیره‌ك ل پارێزگه‌ها دهۆكێ گه‌هشتییه 90%ێ و بریاره ئه‌ڤ سیسته‌مه ل هه‌موو پارێزگه‌هێن هه‌رێما كوردستانێ بهێته دانان.</span></h3> <h3 style="text-align: justify;"><span style="font-size: 18pt;">دراگه‌هاندنا وه‌زاره‌تا كاره‌بێدا هاتییه، سیسته‌مێ دیاركرى دێ كارتێكرنه‌كا ئێكسه‌ر ل سه‌ر زێده‌بوونا كاره‌با نیشتیمانى هه‌بیت، دهه‌مان ده‌مدا هه‌داردانا كاره‌بێ ژلایێ وه‌لاتییانڤه دێ كێمتر لێهێت، و ئێك ژ مفایێن دى یێن ئه‌ڤى سیسته‌مى ئه‌وه كو پسۆله‌یا خواندنا كاره‌بێ و زانیارییان دێ ب شێوه‌یه‌كێ ئه‌لكترۆنى و ئێكسه‌ر ل مالان بیت، بێى كو فه‌رمانبه‌ر بۆ دیاركرنا كوژمێ كاره‌با بكارهاتى بچیته مالان.</span></h3> <h3 style="text-align: justify;"><span style="font-size: 18pt;">هه‌روه‌سا وه‌زاره‌تا كاره‌بێ دیاركر، ژبه‌ر سیسته‌مێ پیڤه‌رێ زیره‌ك سووتان و ژكاركه‌ڤتنا تێلێن كاره‌بێ ب رێژه‌یه‌كا به‌رچاڤ كێمبوویه، نوكه‌ژى بزاڤ دهێنه‌كرن سیسته‌م ببیته پریپه‌ید.</span></h3> <h3 style="text-align: justify;"><span style="font-size: 18pt;">وه‌زاره‌تا كاره‌بێ ئه‌وژى ئاشكراكر، سیسته‌مێ پریپه‌ید ل دوو جهێن پارێزگه‌ها دهۆكێ هاتییه دانان و سه‌ركه‌ڤتنه‌كا به‌رچاڤ تۆماركرییه، سێ هزار و 118 هه‌ڤپشكێن كاره‌بێ ل سه‌نته‌رێ بازارێ دهۆكێ هه‌نه و رێژه‌یا 80% یا هه‌ڤپشكان ئه‌و سیسته‌مه دانایه، بازارێ دهۆكێ پێدڤى ب هه‌شت مێگاواتێن كاره‌بێ یه و دشیاندایه بۆ ماوێ 24 ده‌مژمێران كاره‌ب بهێته دابینكرن، و وه‌لاتى و هه‌ڤپشكێن كاره‌بێ دشێن كارته‌كێ ل سه‌نته‌رێن فرۆتنێ ئه‌وێن ل بازارى هاتینه دانان بكرن و ئاگادارى بكارئینانا رێژه‌یا كاره‌بێ و رێژه‌یا كاره‌با مایى ببن.</span></h3>
