وهزارهتا شههید و كاروبارێن ئهنفالكرییێن ههرێما كوردستانێ راگههاند، مینحه ( مووچه )یێ 578 زیندانى و گرتییێن سیاسى ئهوێن كو چ مووچهیێن دى نینن ڤهگهراند، و ههتا نوكه مووچهیێ سێ هزار و 78 كهسان ڤهگهراندییه.
ل دووڤ نڤیسارا وهزارهتا شههید و كاروبارێن ئهنفالكرییێن ههرێما كوردستانێ كو ئهڤرۆ ب ژماره ( 1694 ) دهركهڤتییه، ل قوناغا ئێكێ یا چاكسازییێ ل بودجهیێ رێڤهبهرییا كاروبارێن زیندانییێن سیاسى، مینحهیا 578 زیندانی و گرتییێن سیاسى ئهوێن كو چ مووچه ل عیراق و ههرێما كوردستانێ نینن، هاتینه ڤهگهراندن.
مینحهیا پێنج هزار و 157 زیندانى و گرتییێن سیاسى ل دووڤ قانوونا ژماره 11 یا سالا 2011ێ هاتبوو راگرتن، پێدڤییه گرتییێن سیاسى بۆ ماوهیێ 10 سالان مفاى ژ قانوون و مینحهیێن خوه ببینن، و ئهو پێنج هزار و 157 كهسه ل ماوێ 10 سالێن بوورى دمفاداربوون و مووچهیێن جۆرهوجۆر وهردگرتن، و ل دووڤ ماددهیهكێ ئهوێ قانوونێ پشتى 10 سالان مووچهیێ ئهوان كهسان هاته راگرتن، وهزارهتا شههید و ئهنفالكرییێن ههرێما كوردستانێ دیاركر، دێ دوڤچوونا رهوشا دارایى یا ئهوان كهسان هێتهكرن، ههر كهسێ دیاربوو كو ئهوى چ مووچه ل ههرێما كوردستانێ و عیراقێ نینن، مووچهیێ وى دێ هێته ڤهگهراندن، لێ ئهو كهسێن مووچهیهك ههی، دڤێت بۆ خوه ب ههلبژێریت یان مووچهیێ زیندانییێن سیاسى وهربگریت یانژى مووچهیێ خوه.
