کار بۆ زێده‌كرنا مووچێ هێزێن پێشمەرگەیی و خانه‌نشینێن هێزێن ناڤخۆ دهێته‌ كرن

ئاژانسا خانی ، زنار تۆڤی:

حکمەت محەمەد گه‌ودا، ئەندامێ لژنا ناڤخۆ و ئاسایشێ و جڤاتا خۆجهی ل پەرلەمانێ کوردستانێ بۆ ئاژانسا خانی دیار كر: مه‌ چەندین سەره‌دان و کۆمبوون ل گەل وەزیرێ ناڤخۆ یێ حکومەتا هەرێما کوردستانێ ئه‌نجامداینه‌، مه‌ پێشنیار داینه‌ رێبەر ئەحمەد وەزیرێ ناڤخۆ، کو پڕۆژەیاسایەكێ ئامادە بکه‌ت یێ تایبه‌ت ب زێده‌كرنا مووچێ خانه‌نشینێن هێزێن ناڤخۆ”.

ناڤهاتی گۆت ژی: ده‌مێ هێزێن ناڤخۆ دهێنه‌ خانەنشین کرن ، مووچێ وان زۆر کێم دبیت، له‌وما ب رژدی ل سه‌ر ئاستێ وەزارەتا ناڤخۆ و جڤاتا وەزیران کار ل سەر دهێته‌ كرن، هه‌روه‌سا مووچێ هنده‌ك پیشمه‌رگان 500 هزار دینارن و یێن هنده‌كان ژی ملیۆن دینارێن عیراقی نه‌ و ئه‌م كار دكه‌ین ئه‌و پێشمه‌رگێن مووچێ كێم ، زێده‌ ببیت.

حکمەت محەممەد زێده‌تر دبێژیت: هه‌كه‌ بابەتێ كێمیيا داهاتی نه‌بایه‌، به‌ری نوكه‌ ئه‌و پرۆژه‌ یاسایه‌‌ داهێته‌ په‌رله‌مانێ كوردستانێ و داهێته‌ په‌سه‌ند كرن، نوكه‌ ژی ئه‌ز گه‌له‌ك یێ گه‌شبینم” كو د ڤی وه‌رزی دا ئه‌و پرۆژه‌ یاسایه‌ دێ هێته‌ ته‌مام كرن و دێ كه‌ڤیته‌ د وارێ بجهئینانێ دا و مووچێ خانەنشینێن هێزێن ناڤخۆ پشتی دهێته‌ پەسەند کرن، دێ بیته‌ نێزیکی %70 ێ ” یێ مووچێ وان.

وی ئەندامێ لژنا ناڤخۆ و ئاسایشێ و جڤاتا خۆجهی ل پەرلەمانێ کوردستانێ دیار كر ژی: مووچێ هنده‌ك پێشمەرگەیان گه‌له‌ك یێ کێمە و ب ره‌نگه‌كێ گشتی مووچێ گه‌له‌ك ژ وان ل ژێر ملیۆن دیناران دایە، له‌وما ئه‌م ب رژدی كاری ل سه‌ر دکەین” كو کێمترین مووچێ پێشمەرگەیان ببیته‌ نێزیكی ملیۆن دیناران”.