نویه‌ر : تووشى په‌نجه‌شێرا پیستى بوویمه‌ و سێ نشته‌رگه‌رى بۆ من هاتینه‌ كرن

گۆلپارێزێ هه‌لبژارتییێ ئه‌لمانیا و یانه‌یا بایرن میۆنخ مانوێل نویه‌رى راگه‌هاند، ئه‌و تووشى په‌نجه‌شێرا پیستى بوویه‌ و سێ نشته‌رگه‌رى بۆ هاتینه‌ كرن.

نویه‌رى دگرته‌ ڤیدیۆیه‌كێدا لسه‌ر ئه‌كاونتێ خوه‌ یێ ئینستاگرامى راگه‌هاند، كو تووشى په‌نجه‌شێرا پیستى بوویه‌ و سێ نشته‌رگه‌رى بۆ هاتینه‌ كرن، و گوت : ژبه‌ركو ئه‌و به‌رده‌وام راهێنانان دكه‌ن و یارییان دكه‌ن و حه‌زدكه‌ن ده‌مه‌كى دگه‌ل هه‌وایێ پاقژ بوورینن، یا گرنگه‌ ئه‌و مادده‌یێن خوه‌ پاراستنێ ژ تیشكێن رۆژێ بكاربینن و خوه‌ ژ پلێن بلند یێن گه‌رمێ یێن كو دگه‌هنه‌ 50 پله‌یان بپارێزن.

ژلایه‌كێ دیڤه‌ راپۆرتێن رۆژنامه‌ڤانى دیاردكه‌ن، ل كانوونا ئێكێ یا سالا 2021ێ به‌رى یارییا به‌رامبه‌ر به‌رشه‌لۆنا دچامپیۆنز لیگێدا گومانێن توشبوونا نویه‌رى ب ئه‌ڤێ نه‌خۆشییێ هه‌بوون، و پشكدارییا وى دمۆندیالێدا ب چ شێوه‌یان دگومانێدا نینه‌.