زنار تۆڤی:
ئیسماعیل بادی، ئەندامێ لژنا رەوشەنبیری ل ناڤەندا خانی یا رەوشەنبیری و راگەهاندنێ، بۆ ئاژانسا خانی دیارکر: ناڤەندا خانی چار پەرتوکێن دی چاپکرن، ژ وان ژی، پەرتووکا (10) شاعرێن عه‌ره‌ب و عیراقى، کو ژ به‌رهه‌ڤكرن و وه‌رگێرانا ئه‌نوه‌ر محه‌مه‌د تاهرییه، كۆمه‌كا هۆزانێن شاعرێن ناڤدار یێن عەرەبن، وه‌كو ” به‌در شاكر سه‌یاب، عه‌بدولوه‌هاب به‌یاتى، ئه‌دونیس، موزه‌فه‌ر نه‌واب، محه‌مه‌د ماغۆت، مه‌حموود ده‌روێش، نزار قه‌بانى، یوسف سائیغ، حه‌سه‌ب شێخ جه‌عفه‌ر و خه‌زعه‌ل ماجدى”، د ناڤ 90 به‌رپه‌راندا چه‌ند هۆزانێن وان وه‌رگێراینه سه‌ر زمانێ كوردى.
هەروەسا پەرتوکا چارده گولێن وه‌ریایی ل شنگالێ، نۆڤلێته‌كا كورته، ژ 64 بەرپەران پێكهاتییه، کو ل دۆر وان چارده پیشمه‌رگه‌یێن شه‌هیدبوویی، ب كریاره‌كا تیرۆرستى هاتبوونه هنگاڤتن و جانێ خۆ ژ ده‌ست دایی، نڤیسه‌رێ پەرتووكێ (شیراز چاربۆتى) شیایه ب كورتى و ب شێوازه‌كێ جوان هیڤی و ئومێدێن وان شه‌هیدان بكه‌ته نۆڤلێت و ل دووماهییا پەرتووكێ ژى هنده‌ك به‌لگه‌نامه و وێنێن وان شه‌هیدا هه‌نه.
ناڤهاتی گۆت ژی: پەرتوکا بارزانییێ نه‌مر د وێنێن هه‌لبه‌ستێدا، كۆمه‌كا هۆزانانه ل دۆر كه‌ساتییا بارزانییێ نه‌مر، ژ نڤێسینا هۆزانڤان عه‌بدولقادر ئۆرمانى یە، پەرتووك ژ 151 به‌رپه‌ران پێكهاتییه، ل دووماهییێ ژى وه‌كو دكیۆمێنت هنده‌ك وێنێن بارزانى تێدا هه‌نه، ل گەل هۆزانان ژى مونتیڤ بۆ هه‌ر هۆزانه‌كێ هاتینه چێكرن، هەروەسا پەرتووکا قه‌له‌م، ژ نڤێسینا محه‌مه‌د عه‌بدوللا ئامێدى یه، به‌رى ده‌مه‌كى ناڤه‌ندا خانى وه‌كو رێزگرتن بۆ خه‌باتا وى، پشتى تووشى نه‌خۆشیه‌كێ بوویى، رێز لێ هاته گرتن و بڕیار دا كو پەرتوكه‌كێ بۆ چاپ بكه‌ن، وی ژى ئه‌ڤ پرتووكه هه‌لبژارت كو بهێته چاپكرن، ناڤه‌رۆكا وێ لدۆر گرنگییا قه‌له‌مى یه، هه‌روه‌سا قه‌له‌مەك ل نك هۆزانڤانێن كورد، پاشى به‌حسێ مه‌دره‌سه‌یێن د به‌رێدا ل ئامێدیێ هه‌ین دكه‌ت، هه‌ر ژ سه‌رده‌مێ میر حه‌سه‌نى و هه‌تا دووماهى مه‌دره‌سه كو قوبه‌هانه خواندن لێ مابوو، كورتییه‌ك ژى ل دۆر كتێبخانه و پەرتووكان ئاخفتییه و ڤان رۆژان دێ ل ژێر چاپێ دەرکەڤیت.
