سوبه‌هى سوودانى دێ چیته‌ ته‌هرانێ

په‌یڤدارێ وه‌زاره‌تا ده‌رڤه‌ یا ئیرانێ ئاشكراكر، ل سه‌ر گازییا فه‌رمى یا سه‌رۆككۆمارێ ئیرانێ، محه‌مه‌د شیاع سوودانى سه‌رۆكوه‌زیرێن عیراقێ دێ سه‌ره‌دانا ته‌هرانێ كه‌ت.

ناسر كه‌نعانى په‌یڤدارێ وه‌زاره‌تا ده‌رڤه‌ یا ئیرانێ، د پرێس كۆنفرانسه‌كیدا راگه‌هاند، ل سه‌ر گازییا فه‌رمى یا ئیبراهیم ره‌ئیسى سه‌رۆككۆمارێ ئیرانێ، سوبه‌هى 29ى چریا دووێ یا 2022ێ محه‌مه‌د شیاع سوودانى سه‌رۆكوه‌زیرێن عیراقێ دێ سه‌ره‌دان ته‌هرانێ كه‌ت.

ناسر كه‌نعانى گوت ژى، ئه‌ڤ سه‌ره‌دانه‌ ژ چارچووڤێ به‌رده‌وامبوونا دانوستاندنێن هه‌ردوو وه‌لاتا لسه‌ر بابه‌تێن سیاسى، ئابوورى و بازرگانیییه‌.

كه‌نعانى دیارژى كر، هه‌ردوو حكومه‌تێن ئیران و عیراقێ وه‌ك دوو وه‌لاتێن جیران گه‌له‌ك به‌حس و بابه‌تێن گرنگ و هه‌ڤپشك دگه‌ل ئێك هه‌نه‌، و ئه‌ڤ سه‌ره‌دانه‌ دێ بیته‌ هاریكار بۆ هندێ ئاستێ په‌یوه‌ندییان دبوارێن جوودا دا و ب تایبه‌ت دبوارێ ئابووریدا زێده‌تر بلند ببیت.