مه‌سرور بارزانى دگه‌ل بالیۆزا سوید ل عیراقێ كۆمبوو

مه‌سرور بارزانى سه‌رۆكێ حكومه‌تا هه‌رێما كوردستانێ پێشوازى ل بالیۆزا سوید ل عیراقێ كر، و د دیدارا واندا بالیۆزا سویدێ په‌سنا پرۆسه‌یا پێشكه‌ڤتن و ئاڤه‌دانكرنا هه‌رێما كوردستانێ كر.

نڤێسینگه‌ها سه‌رۆكوه‌زیرێن هه‌رێما كوردستانێ راگه‌هاند، ئه‌ڤرۆ شه‌شى كانوونا ئێكێ یا 2022ێ، مه‌سرور بارزانى سه‌رۆكێ حكومه‌تا هه‌رێما كوردستانێ پێشوازى ل جیسیكا سڤاردسترۆم بالیۆزا سوید ل عیراقێ كر، و د دیدارا واندا پێشڤه‌برنا په‌یوه‌ندییێن سوید و هه‌رێما كوردستانێ و ره‌وشا گشتییا عیراقێ و ده‌ڤه‌رێ هاتنه‌ گوتوبێژكرن.

جیسیكا سڤاردسترۆم په‌سنا پرۆسه‌یا پێشكه‌ڤتن و ئاڤه‌دانكرنا هه‌رێما كوردستانێ كر، و حه‌زا وه‌لاتێ خوه‌ بۆ مۆكۆمكرنا په‌یوه‌ندییان دگه‌ل هه‌رێما كوردستانێ ده‌ربرى.

ژلایێ خۆڤه‌ مه‌سرور بارزانى كورتییه‌ك ده‌رباره‌ى چاكسازییێن كابینه‌یا نه‌هێ دبوارێ هه‌مه‌جووركرنا ئابوورى و دیجیتالكرنا خزمه‌تگوزارییێن گشتیدا و پێنگاڤێن حوكمرانییا ئه‌لكترۆنى و ئاسانكاریكرن بۆ وه‌به‌رهێنه‌ران و ره‌خساندنا ده‌رفه‌تێن كارى روونكر.

نڤێسینگه‌ها سه‌رۆكوه‌زیرێن هه‌رێما كودستانێ راگه‌هاند، گرنگییا چاره‌سه‌ركرنا ئاریشه‌یێن دناڤبه‌را هه‌رێما كوردستانێ و حكومه‌تا فیدرالدا ل سه‌ر بنه‌مایێن ده‌ستوورى و ره‌وشا ئاواره‌ و په‌نابه‌ران و به‌رهه‌ڤییێن رووبرووبوونا كارتێكرنێن نه‌رینى یێن گهورینا سه‌قای لسه‌ر ژیانا وه‌لاتییان، و چه‌ند ته‌وه‌رێن دى هاتنه‌ گوتوبێژكرن.