ب مێهڤاندارییا شاندێ حکومەتا هەرێما کوردستانێ، جڤاتا وەزاریی یا ئابووری یا عیراقی ب سەرۆکایەتییا د.فوئاد حسێن کۆمبوو و ناڤەرۆکا پرۆژە یاسایا بودجا سالا 2023 و پشکا هەرێما کوردستانێ گوتوبێژ کر.
وەزیرێ دارایی یێ عیراقێ ڕاگەهاند،” ڕێککەفتن لسەر وان بڕگێن تایبەتن ب هەرێما کوردستانێ ڤە گرنگە.”
رۆژا دووشەمبی 12-12-2022، ب سەرۆکایەتییا د. فوئاد حوسێن، جێگرێ سەرۆکوەزیران و وەزیرێ دەرڤە یێ عیراقێ کۆمبوونا جڤاتا وەزاری یا ئابووری، ب ئامادەبوونا وەزیرێن پلاندانان، دارایی، بازرگانی، پیشەسازیی، کشتوکاڵ، کار و کاروبارێن جڤاکی، ئەمیندارێ گشتیی یێ جڤاتا وەزیران، پارێزگارێ بانکا ناڤەندی یا عیراقێ و شیرەتکارێن سەرۆکوەزیران بۆ کاروبارێن ئابووری و یاسایی ب ڕێڤەجوو.
ل گۆرەی ڕاگەهاندنەکا نڤیسینگەها د.فوئاد حسێ، جڤاتێ مێهڤاندارییا شاندێ هەرێما کوردستانێ کر، کو پێکهاتبوون ژ وەزیرێ دارایی و ئابووری، وەزیرێ سامانێن سروشتی، سەرۆکێ دیوانا چاڤدێرییا دارایی، سەرۆکێ دیوانا سەرۆکایەتییا جڤاتا وەزیران، نوونەرێن حکومەتا هەرێما کوردستانێ ل بەغدا، ژمارەیەکا شیرەتکار و ڕێڤەبەرێن گشتی.
د کۆمبوونێ دا، وەزیرێ دارایی یێ عیراقێ، گرنگترین بڕگێن پڕۆژە یاسایا بودجێ و ناڤەڕۆکا پڕوژەی باس کرن و ئاماژە ب گرنگییا ڕێککەفتنێ لسەر وان بڕگێن تایبەتن ب هەرێما کوردستانێ ڤە کرن.
هەر وەسا وەزیرێ پلاندانانا عیراقێ گوتی:”ئاراستێ حکومەتێ و سەرۆکوەزیران ئەوە گشت ئاریشێن هەلاویستی یێن دناڤبەرا بەغدا و هەولێرێ دا بهێنە چارەسەرکرن.هەر وەکی د بەرنامێ حکومی یێ داهاتی دا و ئاماژە ب پێکئینانا سێ لژنەیێن هەڤپشک کری.
ئێک: دانوستاندنێن هەڤپشک بۆ پڕۆژە یاسایا بودجا گشتی یا وەلاتی.
دوو: یاسایا نەفت و گازێ و پێگیربوونا هەڤپشک.
سێ:تایبەت ب کارێن دەرگەهێن سنووری.
ئاوات جەناب نووری، وەزیرێ دارایی و ئابووری یێ حکومەتا هەرێما کوردستانێ دبێژیت: “حکومەتا هەرێما کوردستانێ، دڤێت گشت بابەتێن هەلاویستی و ئالۆزییا، سفر بکەت.”
