سوودانى : پێدڤییه‌ ته‌كتیكه‌كا له‌شكه‌رى یا نوو بۆ رووبرووبوونا داعشێ بهێته‌ بكارئینان

سه‌رۆكوه‌زیرێن عیراقێ داخوازێ ژ فه‌رمانده‌یێن له‌شكه‌رى دكه‌ت هونه‌ر و ته‌كتیكێن له‌شكه‌رى یێن نوو بۆ رووبرووبوونا داعشێ بكاربینن و دبێژیت: نابیت ئێدى شێوازى كلاسیكى بۆ رووبرووبوونا داعشێ بهێته‌ بكارئینان.

ئه‌ڤرۆ 22ى كانوونا ئێكێ یا 2022ێ محه‌مه‌د شیاع سوودانى فه‌رمانده‌یێ گشتییێ هێزێن چه‌كدارێن عیراقێ دكۆمبوونا جڤاتا وه‌زارییا ئاسایشا نیشتیمانیدا دگه‌ل فه‌رمانده‌یێن له‌شكه‌رى دووپاتكر، پێدڤییه‌ هونه‌ر و ته‌كتیكێن له‌شكه‌رى بهێنه‌ گوهۆرین و نابیت ئێدى شێوازى كلاسیكى بۆ رووبرووبوونا داعشێ بكاربهێن، داكو شیانێن تیرۆرستان لاواز بكه‌ن و لڤینێن وان سنۆردار بكه‌ن.

دكۆمبوونێدا سوودانى داخواز ژ فه‌رمانده‌یان كر ب شێوه‌یه‌كێ مه‌یدانى ل جهێ ئوپه‌راسیۆنان به‌رهه‌ڤبن و نێزیكى ئه‌فسه‌ر و كارمه‌ندان بن، و كار بۆ بلندكرنا مورالا سه‌ربازان بكه‌ن و ب شێوه‌یه‌كێ ئێكسه‌ر پشكدارییێ د جهئینانا پلانا مه‌یدانیدا بكه‌ن.

هه‌روه‌سا سوودانى دووپاتى ل هندێ كر، دڤێت هه‌ماهه‌نگییه‌كا بهێز دناڤبه‌را ده‌زگه‌هێن هه‌والگێرى و یه‌كه‌یێن سه‌بازیدا هه‌بیت و ب ئوپه‌راسیۆنێن نایاب راببن و گورزێن مه‌زن و پێشوه‌خت ل دوژمنى بده‌ن.