سەرۆكوەزیرێن عیراقێ بۆ بانكا ناڤەندی: پێدڤییە رێكێ نەدەن ل بازاری یاری ب بهایێ دراڤی بهێتەكرن

سەرۆكوەزیرێن عیراقێ دگەل پارێزگارێ بانكا ناڤەندی كۆمبوو و دبێژیت: پێدڤییە بانكا ناڤەندی رێكێ نەدەت ل بازاری یاری ب دراڤی بهێتەكرن، دهه‌مان ده‌مدا داخوازكر ب رێكارێن بله‌ز بۆ درووستكرنا هه‌ڤسه‌نگییێ دبازاریدا راببن.

بانكا ناڤه‌ندییا عیراقێ دراگه‌هاندنه‌كێدا ئاشكراكر، جڤاتا برێڤه‌برنا بانكێ كۆمبوو و دانوستاندن ل دۆر نزمبوونا بهایێ دینارى ل بازارێن نافخۆ به‌رامبه‌ر دۆلارى و وان فشارێن ده‌مكى یێن ژ ده‌رڤه‌ و د نافخۆیا عیراقێدا هه‌ین كر.

بانكا ناڤه‌ندی داخوازێ ژ بازرگانان دكه‌ت په‌یوه‌ندییا وان ب شێوه‌یه‌كێ ئێكسه‌ر دگه‌ل بانكان بیت و له‌زێ دكرینا دۆلاریدا نه‌كه‌ن و خوه‌ ژ مه‌زاختنێن زێده‌ دووربكه‌ن.

بانكا ناڤه‌ندى د به‌شه‌كێ دییێ راگه‌هاندنا خوه‌دا دیاركر، محه‌مه‌د شیاع سوودانى سه‌رۆكوه‌زیرێن عیراقێ دگه‌ل مسته‌فا موخیف پارێزگارێ بانكا ناڤه‌ندى كۆمبوو، و دانوستاندن ل دۆر گهورینێن بهایێ دینارێ عیراقى به‌رامبه‌ر دۆلارێ ئه‌مریكى كر.

ل دووڤ راگه‌هاندنا نڤێسینگه‌ها رۆژنامه‌ڤانییا محه‌مه‌د سوودانى، دوێ كۆمبوونێدا سه‌رۆكوه‌زیران دووپاتى ل هندێ كر كو پێدڤییه‌ رێكارێن پێدڤى بۆ رێگرتنێ ژ یارییێن نه‌قانوونى ب بهایێ دینارى به‌رامبه‌ر دۆلارى و هه‌موو كارێن دبنه‌ ئه‌گه‌رێ زیان گه‌هاندنێ ب بازارى و بلندبوونا بهایان بهێنه‌ بكارئینان.

سوودانى بانكا ناڤه‌ندى پالدا سه‌قامگێرییه‌كا گشتى بۆ بهایێ دراڤى به‌رده‌ست بكه‌ت و پێنگاڤێن كارا بۆ فرۆتنا دراڤێ بیانى به‌رامبه‌ر وه‌لاتییان ب رێكا كارتا ئه‌لێكترۆنى پاڤێت.