ب چاڤدێرییا پارێزگارێ دهۆكێ رێكا گۆندێن (ئامادا – بێخمێ – كانى توزێ) ب درێژاهییا 21كم هاته ڤه‌كرن.
پارێزگه‌ها دهۆكێ راگه‌هاند، گرنگیدان ب پرۆژێن خزمه‌تگوزارى ئه‌وێن ل ده‌ڤه‌را ئاكرێ دهێنه بجهئینان، و ب چاڤدێرییا د.عه‌لى ته‌ته‌ر پارێزگارێ دهۆكێ و ب ئاماده‌بوونا بابه‌كر زێبارى شیره‌تكارێ سه‌ربازى ل سه‌روكاتییا هه‌رێما كوردستانێ و مه‌ردان خدر به‌رپرسێ لقا 9 یا پارتى و شه‌عبان خه‌لیل ده‌ڤه‌ردارێ ئاكرێ ب وه‌كاله‌ت و چه‌ند به‌رپرسێن حزبى و ئیدارى و له‌شكه‌رى رێوره‌سمێن ڤه‌كرنا رێكا (ئامادا – بێخمێ – كانى توزێ ) هاتنه گێران.
ده‌ڤه‌ردارێ ئاكرێ دپه‌یڤه‌كێدا سوپاسییا سه‌روكێ حكومه‌تا هه‌رێما كورستانێ و پارێزگارێ دهۆكێ كر ل دۆر وێ گرنگییا ب ده‌ڤه‌را ئاكرێ د ده‌ن، و خواست به‌رده‌وام ئه‌ڤ جوره پرۆژه بهێنه بجهئینان.
هه‌روه‌سا پارێزگارێ دهۆكێ دپه‌یڤه‌كێدا ب ناڤێ سه‌روكێ حكومه‌تا هه‌رێما كوردستانێ پیروزباهییا خه‌لكێ ده‌ڤه‌رێ كر و گوت: سه‌روك بارزانى ژى هه‌رده‌م ته‌كه‌زی دكر كو گرنگى ب ڤێ ده‌ڤه‌رێ بهێته دان وئه‌ڤ رێكه بهێته چێكرن، ژبه‌ركو رێكه‌كا ستراتیجییه و ئاكرێ ب ده‌ڤه‌را خلێفان و سورانڤه گرێدده‌ت و پتر ژ18 گوندان دێ مفاى ژێ بینن .
هه‌روه‌سا گوت: نوكه پتر ژ(54) پرۆژان ل ده‌ڤه‌ردارییا ئاكرێ دهێنه بجهئینان و بهایێ وان ژ( 43) ملیار دیناران پتره، و ته‌كه‌زكر بۆ سالا نوو ژى دێ ژماره‌كا پرۆژێن خزمه‌تگوزارى د هه‌موو بیاڤاندا هێنه بجهئینان.
دهێته زانین درێژاهییا رێكا (ئامادا – بێخمه – كانى توزێ ) 21كم و ب كوژمێ (3) ملیار و(826) ملیون دیناران ل سه‌ر بودجا حكومه‌تا كوردستانێ و ژلایێ كۆمپانیا شینالڤه هاتییه ڤه‌كرن وقێركرن.
