کوتلا وەزاری یا پارتی دیموکراتی کوردستان ڕادگەهینیت، ب مخابنیڤە ل شوینا گوتوبێژ و کۆمبوونان، تیما ئێکەتییێ ب کارڤەدانێن لاواز بەرسڤا مە دا.
ئه‌ڤرۆ دوو شەمبی 16 كانوونا دووێ 2023، کوتلەیا وەزاری یا پارتی دیموکراتی کوردستان، ڕۆهنکرنەک بەلاڤکر و تێدا هاتیە:”خەلکێ کوردستانێ یێ هشیارە و داخواز ژ هەوە دکەین هوین ژی ڤەگەریێنە سەر گوتار و دیدار و گوتنێن خۆ یێن سالێن بەری نوکە، کا چاوا هەوە باس ل دەستکەفت و کار و چالاکی و سەرکەفتنا کابینەیا نەهێ دکر.”
دەقێ ڕۆهنکرنێ:
پشتی پەیاما بەرێز سەرۆکێ حکومەتا هەرێما کوردستانێ کو زۆر ب ڕۆهنی باس ل وان ئاریشەیان کر یێن کو ئێکەتی نیشتیمانی کوردستان ل بەرامبەری حکومەتا هەرێمێ دروست دکەت، د هەمان دەم دا چارەسەری ژی بەرچاڤکرن، بەلێ ب مخابنیڤە تیما ئێکەتییێ ل شوینا گوتوبێژ و کۆمبوونان، ب کارڤەدانێن لاواز بەرسڤا مە دایە، لەورا ل ڤێرێ ب پێدڤی دزانین ئەوان راستییان بەرچاڤ بکەین:
-پشکداری نەکرن د هندەک کۆمبوونێن حکومەتێ دا و دەرکەفتن ژ گڕۆپێن واتساپی، هەر وەسا ئامادە نەبوونا هەوە بۆ چارەسەرکرنا ئاریشەیان و باسکرن د کۆمبوونێن جڤاتا وەزیران دا، ب ڕامانا ڕەڤینێ یە ژ بەرپرسیارەتییا یاسای و سیاسی و ئیداری.
-خەڵکێ کوردستانێ یێ هشیارە و داخواز ژ هەوە دکەین هوین ژی ڤەگەریێنە سەر گوتار و دیدار و گوتنێن خۆ یێن سالێن بەری نوکە، کا چاوا هەوە باس ل دەستکەفت و کار و چالاکی و سەرکەفتنا کابینەیا نەهێ دکر، ئەگەر کێموکاسیەک ژی د ڤێ کابینەیێ دا هەبیت، ئەو ژ دەرئەنجامێ وێ سیاسەت و رێگیریێ یە، یا کو ئێکەتی برێڤە دبەت، هەوە دڤێت لاوازیا پێگەهێ حزبی و سیاسی و دیپلوماسی و جەماوەری یێ خۆ و ئاریشەیێن ناڤخۆ ب وێ چەندێ ڤەشێرن کو رێکێ نەدەن حکومرانیەکا سەرانسەری و شەفاف یا دارایی و داهاتی و حوکمێ یاسایێ ل سنوورێ پارێزگەها سلێمانییێ بهێتە ئەنجامدان و میلیشیا ڤێ سیاسەتێ لسەر خەلکی ب سەپینن و بێژن ئەگەر دەنگ و کورسیێن مەژی د کێم بن، بەلێ ئەم دێ خۆ فەڕز کەین، خەلک و دوست و نەحەز ژی شاهدییێ بۆ ئیدارەیا هەوە ل سنوورێ پارێزگەها سلێمانییێ و هەلەبجە ددەن کا خەلک د چ نە ئارامی و بێ خزمەتگوزارییان دا ژیانا خۆ د بورینن.
-جڤاتا وەزیران بڕیار یا دای هێزێ بۆ ڕێگیریکرن ل کارێ دزی و دژی بەڕژەوەندییێن وەلاتییان بۆ هەمی سنوورێن هەرێمێ بهنێریت و نە گوتیە بتنێ بۆ سنوورێ پارێزگەها سلێمانییێ، بەلێ چونکی هوین دزانن ل سنوورێ پارێزگەها سلێمانییی چ رووددەت، لورا هوین رێگیریێ ل دەستپێشخەریەکا بڤی رەنگی دکەن، بفەرموون هەر چ یا هوین خۆ پێ ب شارەزا دزانن و ب دلێ هەوە و خەلکێ هەوەیە، بلا دگەل هێزێ بیت بۆ هەمی سنووران.
-پڕۆسەیا نەفتێ ل هەرێما کوردستانێ یا کو د کابینا بووری دا هاتیە ئەنجامدان کو جێگرێ سەرۆکێ حکومەتێ سەر ب ئێکەتیێ ڤە بوو، ب تایبەت ژی بەرێز (قوباد تاڵەبانی) ل ئاستێ بلند یێ ڤێ حزبێ، د چەندین کۆمبوونان دا هەوە گوتیە، ئەم د ئاگەهداریی هویرکاتیاینە ژ کابینا بووری تا نوکە ب سەرپەرشتیا سکرتێرێ جڤاتا وەزیران کو سەر ب ئێکەتیێ ڤەیە، کۆمپانیەکا جیهانی یا باوەرپێکری یا تایبەتمەند د ڤی بواری دا، سەرپەرشتی و هویربینییا فروشتنا نەفتێ دکەت.
- کەس نەشێت ل سنوورێ پارێزگەها هەولێرێ گەفان بکەت، ئەوا دگەل بەرێز جێگرێ سەرۆکوەزیران روودای، بتنێ پەیوەندیەکا تەلەفونی بوو دگەل برادەرەکێ خۆ یێ کەڤن، بەلێ ئەگەر هەوە دڤێت ڤی کاری ل بەرامبەر ئاستێ ویت کارێ تیرۆرستی یێ بەرامبەر (شەهید هاوکار جاف) ل پایتەختی هاتیە ئەنجامدان بەراورد بکەن، ئەڤە خەیالە.
– مە هەر ژ ڕۆژا ئێکێ یا تیرۆرکرنا شەهید هاوکار جاف ب نامەیەکا فەرمی داخواز ژ هەوە کریە کو د هاریکاربن د ڤەکۆلینا دگەل تاوانباران دا، بەلێ هەوە خۆ ژ بابەتی ڤەدزیە و تا نوکە ژی د ئامادە نینن تۆمەتباران بیننە بەرامبەری دادگەهێ.
- هەلبژارتنان ڕێکار و یاسایا خۆ هەیە، نابیت ژ تڕسا هندێ کو دەنگێن هەوە زۆر بێدەنگ بووینە بچن ل بەهانەیان بگەڕن، ل کیژ جهێ دونیایێ هەیە حزب ببیتە قەلغان ل هەمبەر پڕۆسەیا دیموکراسی، بفەرموون بلا ل پەرلەمانی و د چوارچوڤێ یاسایێ دا، هەر گوتوبێژەکا هەی بهێتە کرن، ئەرێ پارتی ئەڤ یاسایە دانایە؟ هەو ژی وەکی پارتی و زێدەتر ژی پشکداری یا کر، دەستێ هەوە د دەرکرنا هەمی یاسایێن پەڕلەمانی و بریارێن حکومەتێ دا نەبوو؟.
- داخواز ژ هەوە دکەین نەبنە رێگر ل بەرامبەر بڕیارێن حکومەتا هەرێمێ و د بەرامبەردا پێدڤییە د هاریکاربن و ڤەگەریێنە سەر کارێن خۆ، ل وی دەمی دێ بەرپرسیارەتی دیار بیت، ئەگەر هەوە ژ گوشتی بەهر هەیە و وە بەهرا خۆ دڤێت، پیچەکێ ژ ئافکا گوشتی ژی بخۆن.
کوتلەیا وەزاری یا پارتی دیموکراتی کوردستان
16-1-2023
