جێگرێ سەرۆکا پەڕلەمانێ کوردستانێ دوپاتکر، درێژکرنا دەمێ یاساییێ پەرلەمانێ کوردستانێ ژ ئەگەرێ دیتن و بوچوونێن لایەنێن سیاسی دەربارەی شێوازێ هەلبژارتنان و داخوازییا وان بۆ کاراکرنا کۆمسیونێ بوو، تا کو وی دەمێ بگەهنە ڕێککەفتنێ، د نوکە دا لێکنێزیکبوونەکا باش دناڤبەرا لایەنێن سیاسی دا هەیە بۆ ئەنجامدانا هەلبژارتنان.
ئەڤرۆ دوو شەمبی هێمن هه‌ورامی، جێگرێ سه‌رۆكا په‌رله‌مانێ كوردستانێ، پێشوازی ل ریكاردۆ رۆدریگێز، به‌رپرسێ نڤیسینگەها یۆنامی له هه‌رێما كوردستانێ كر و د دیدارەکێ دا، دوماهی پێشهات و رەوشا سیاسی یا هه‌رێما كوردستانێ و عیراقێ و پرسا ئه‌نجامدانا هه‌لبژارتنێن په‌رله‌مانێ كوردستانێ گوتوبێژ کرن.
ل گۆرەی ڕاگەهاندنەکا پەرلەمانێ کوردستانێ، د دیدارێ دا هێمن هەورامی، تەکەزی لسەر ئەنجامدانا پڕۆسا هەلبژارتنان بۆ خۆلا شەشێ یا پەرلەمانیی وەک مافەکێ گشتی یێ خەلکێ کوردستانێ کریە و ئاماژە کریە ژی پرۆسەیا دیموکراسی دێ زێدەتر یا ب باوەری بیت کو هەر چار سالان جارەکێ ل دەمێ خۆ یێ دیارکری یێ هەلبژارتنان دا بهێتە ئەنجامدان.
هه‌ر د دیدارێ دا، جێگرێ سه‌رۆكا په‌رله‌مانێ كوردستانێ، ئاماژه ب لایه‌نێ سیاسی، یاسایی و ته‌كنیكی یێ ئه‌نجامدانا پرۆسه‌یا هه‌ڵبژارتنان كر و راگەهاند، “بۆ خواندنا ئێکێ یا وان پێشنیازە یاسایان کو گرێداینە ب هەموارکرنا یاسایا هەلبژارتنان و کاراکرنا کۆمسیونێ ڤە، کو ژ لایێ فڕاکسیونێن جێواز یێن پەرلەمانی ڤە ب جودا جودا پێشکێشی سەرۆکایەتییا پەرلەمانی هاتینە کرن، د دەمێ داهاتی دا پێدڤیە پەرلەمانێ کوردستانێ بێخیتە د بەرنامێ روونشتنەکا نە ئاسای یا خۆ دا و پشتی گەهشتنێ ب خالەکا هەڤپشک و تێگەهشتنا سیاسی یا لایەنان لسەر ڤان پێشنیازە یاسایان، ئەرکێ پەرلەمانی یە رێکارێن دی یێن یاسای بگریتە بەر ژ بۆ هندێ خواندنا دووێ بۆ بهێتە کرن و پاشی دەنگ لسەر بهێتە دان.”
هەر وەسا هێمن هەورامی، داخواز ژ یۆنامی، کۆمەلگەهێ ناڤدەولەتی و سەرجەم وان رێکخراو و ناڤوندان کر یێن کو چاڤدێرییا پڕۆسەیا هەلبژارتنان دکەن، ژ نێزیکڤە چاڤدێرییا پڕۆسەیا هەلبژارتنێن هەرێما کوردستانێ بکەن.
