ل ئێڤارییا ئه‌ڤرۆ سێشه‌مبى 24 ی كانوونا دووێ 2023 ێ ل كوچكا مێهڤاندارییا “د. عه‌لى ته‌ته‌ر” پارێزگارێ دهۆكێ پێشوازی ل “مه‌مه‌د مه‌ولود” كونسلێ گشتى یێ وه‌لاتێ توركیا ل هەرێما کوردستانێ كر.
د هه‌ڤدیتنه‌كێدا به‌حسێ وێ تاوانا ل شه‌ڤا 18 ل سه‌ر 19 ڤێ مه‌هێ دناڤبه‌را باژێرێن نسێبینێ و مێردینێ دا ل هه‌مبه‌ر وه‌لاتیێن سڤیل یێن پارێزگه‌ها دهۆكێ هاتیه ئه‌نجامدان و بوویه ئه‌گه‌رێ شه‌هیدبونا پێنچ وه‌لاتیێن بێگونه‌هـ و ئه‌نجامێن دووماهییێ یێن ڤه‌كۆلینان ده‌رباره‌یى روودانێ ب گشتى هاته كرن .
د ته‌وه‌ركێ دى دا به‌حسێ په‌یوه‌ندیێن دوقولى دناڤبه‌را هه‌رێما كوردستانێ و ده‌وله‌تا توركیا و چاوانیا پێشئێخستنا ئاستێ وان په‌یوه‌ندیان دهه‌موو بیاڤان دا هاته كرن.
پاشی پارێزگارێ دهۆكێ و كونسلێ گشتى یێ وه‌لاتێ توركیا ب هه‌ڤرا پشكدارى دبیه‌هیا هه‌ر پێنچ قوربانیێن روودانا مێردینێ دا كر ، كونسلێ توركیا سه‌رخۆشیێن خۆ گه‌هاندنه هه‌ردو خێزانا و ژخودێ خواست كو جهێ قوربانیا بكه‌ته به‌هه‌شتا به‌رین و سه‌بر و و هه‌دارێ بده‌ته ماڵباتێن وان.
هه‌روه‌سا گوت ژی: ژبه‌ر وێ رودانێ ئه‌م گه‌له‌ك ب خه‌م كه‌فتین و ده‌زگه‌هێن په‌یوه‌ندیار چار كه‌س ل سه‌ر ڤێ كه‌یسێ گرتینه و ڤه‌كۆلینێن هوور ل سه‌ر تاوانبارا دهێنه كرن و ته‌كه‌ز كر كو پشتى ڤه‌كۆلینێ تاوانبار لدووڤ یاسایێن توركیا دێ گه‌هنه سزایێ خۆ و یاسا دێ جهێ خۆ گریت .
هه‌روه‌سا نوونه‌رێ هه‌ردوو بنه‌ماڵا یاداشته‌ك دا ده‌ستێ كونسلێ توركیا و خواست كو هه‌ردو حكومه‌تێن هه‌رێما كوردستانێ و حكومه‌تا توركیا ب هه‌ڤرا كاربكه‌ن و ڤه‌كۆلینێن رژد بكه‌ن و راستییا كه‌یسێ بهێته ئاشكرا كرن و تاوانبار بهێنه سزادان و مافێ قوربانیا نه‌هێته به‌رزه‌كرن.
ژلایێ خوڤه پارێزگارێ دهۆكێ ته‌كه‌زكر كو”سه‌رۆك مه‌سعود بارزانى” و سه‌رۆكێ هه‌رێما کوردستانێ و سه‌رۆكێ حكومه‌تا هه‌رێما كوردستانێ و هه‌موو لایه‌نێن په‌یوه‌ندیدار ب رژدى دووڤچوونا ڤێ كه‌یسێ دكه‌ن كو تاوانبار بهێنه دیار كرن و سزادان.
