حکومەتا هەرێما کوردستانێ ڕاگەهاندنەک ل دوور بڕیارا دادگەها فیدڕالی یا عیراقێ بەلاڤکریە و ڕاگەهاندیە، ” ب مخابنیڤە ئەڤرۆ دادگها فیدڕالی، جارەکا دی دژایەتییا خۆ بۆ مافێن دەستووری و شایستێن دارایی یێن خەلکێ کوردستانێ دوپاتکر، ئەڤ هەلویستێ نوو یێ ڤێ دادگەهێ، تەکەزکرنە ب درێژەدان ب سیاسەتا نە ڕەوا و دژایەتیکرنا خۆ بەرامبەر هەرێما کوردستانێ، د دەمەکی دا کو سەقایەکێ ئەرێنی و ل ئێک نێزیکبوون دناڤبەرا هەردوو حکومەتێن هەرێمێ و فیدڕال دا دروست ببوو بۆ ڕێککەفتن و چارەسەرکرنا ئاریشەیان لسەر بنەمایێ دەستووری، ل جهێ پشتەڤانی و سەقایێ ئەرێنی یێ کو دروست بووی، د بڕیارەکا نە ڕەوا دا و دژی خەلکێ هەرێما کوردستانێ، ڕێگری ل هنارتنا وی کوژمێ پارەی کر یێ کو بڕیار بوو ژ لایێ حکومەتا فیدڕال ڤە بۆ هەرێما کوردستانێ بهێتە هنارتن.”
دیارکریە ژی،” حکومەتا هەرێما کوردستانێ چەندین جاران شاند هنارتینە بەغدا و د دوماهی سەرەدان ژی دا، ل بەغدا گوتوبێژێن گەلەک بەرهەمدار هاتینە کرن و هەردوو لا ئنیەت پاکیا خۆ بۆ چارەسەرکرنا ئاریشەیان د چوارچووڤێ دەستووری و کارناما کو لایەنێن سیاسی لسەر ڕێککەفتین دوپاتکریە.”
حکومەتا هەرێمێ د ڕاگەهاندنا خۆ دا دیارکریە،” هەرێما کوردستانێ، هەرێمەکا فیدرالی دەستوورییە و ئەڤ بڕیارە بنپێکرنەکا زەق و ئاشکرا یا دەستوورێ عێراقێ یە، هەر وەسا دژی ڕێککەفتنا لایەنێن ئیداری یێن دەولەتێ یە بۆ پێکئینانا حکومەتا نوو و دژی کارناما وەزاری یا حکومەتا عیراقی ژی یە کو ژ لایێ جڤاتا نوونەرێن عیراقێ ڤە هاتیە پەسەندکرن و تێدا د بڕگەیەکێ دا ب ڕۆهنی باس ل خۆ دویر گرتن ل هەر ڕێکارەکێ دکەت کو ئاریشەیان ئالۆزتر لێبکەت ( تجنب اية اجراءات تصعيدية)، لەوڕا ئەم وێ بڕیارا دادگەها فیدڕالی، ب بڕیارەکا نە بتنێ ل دژی هەرێما کوردستانێ، بەلکو ل دژی حکومەتا نوو یا عیراقێ و لایەنێن پێکئینەر یێن حکومەتێ دزانین و پێدڤیە هەلویستەکێ ڕۆهن و ئاشکرا ل بەرامبەر بڕیار و ڕەفتارێن نە ڕەوا یێن دادگەها فیدڕالی هەبیت، هەر وەکی د کارناما وەزاری یا حکومەتا عیراقێ ژی دا هاتی، هەمی لایەنێن پشکداربووی لسەر ڕێککەفتین، پێدڤیە د دەمێ شەش مەهان دا، پرۆژە یاسایا دادگەها فێدڕالێ دەرکەڤیت، چونکی ل ژێر سیبەرا ڤێ دادگەها نوکە، کو ل گۆرەی دەستووری نەهاتیە دروسکرن، چ دەرفەتەک بۆ چارەسەرکرنا ئاریشەیان نینە و نابیت.”
حکومەتا هەرێمێ د ڕاگەهاندنا خۆ دا ئاماژە کریە:”هەرێما کوردستانێ ڕێزێ ل دەستوور و یاسا و دادگەهێن شەرعی دگریت، بەلێ ئەڤ دادگەهە ب شێوەیەکێ دەستووری نەهاتیە پێکئینان و ڕێکخستن و نەشێتن وەک دادگەهەکا فیدڕالی بڕیارێ بدەت، لەوڕا ئەم بڕیارێن وێ دادگەهێ رەت دکەین و داخوازێ ژی ژ حکومەتا فیدڕال دکەین، نە چیتە بن بارێ ڤێ بڕیارێ و پابەند ببیت ب وێ سوزا کو بۆ هنارتنا شایستێن دارایی یێن هەرێما کوردستانێ داین.”
