سەرۆکێ هەرێما کوردستانێ پەیامەک دەربارەی بڕیارا دادگەها فیدراڵی یا عیراقێ بەڵاڤکر و دبێژیت ، “بڕیارەکا تەمام نە دادپەروەرانە و ستەمکارانەیە.” نێچیرڤان بارزانی، سەرۆکێ هەرێما کوردستانێ د پشکەکا پەیاما خۆ دا دبێژیت،”بڕیارا ئەڤرۆ یا دادگەها فیدڕالی یا عیراقێ ب نە دروستییا هنارتنا شایستێن دارایی و مووچەیێن مووجەخورێن هەرێما کوردستانێ ژ لایێ حکومەتا فیدڕال یا عیراقێ ڤە ل سالێن 2021 و 2022 بڕیارەکا تەمام نە دادپەروەرانە و ستەمکارانەیە.”
سەرۆکێ هەرێما کوردستانێ ئاماژە کریە ژی،” ئەو بڕیارە نە بتنێ مووچەخوران و خەلکێ هەرێما کوردستانێ کو وەلاتییێن عیراقێ نە، بەلکو تەمام پرۆسە و ئارامیا سیاسی و ئەوێ ڕێککەفتنێ ژی دکەتە ئارمانج یا کو حکومەتا نوو یا عیراقێ لسەر هاتیە دامەزراندن.”
نێچیرڤان بارزانی گوتیە ژی، عیراق د پرۆسەیەکا درێژ و ئاڵۆز یا سیاسی و نە ئارام دا دەربازبوویە تا کو دوماهیک جار حکومەتەک ل بەغدا هاتیە پێکئینان دا کو هیڤی و ئومێدا خەلکێ عیراقێ ئەوە لسەر قۆناغەکا ئارام و باشتر بۆ داهاتووی دەرباز ببیت،” هەمی چاڤەڕێبوونەک ژ دادگەها بلند یا فیدڕالی یا عیراقێ ئەو بوو کو بۆ پاراستنا بەرژەوەندییێن هەمی پێکهاتێن عیراقێ و لبەرچاڤگرتنا ڕەوشا سیاسی، نە بیتە ئەگەرێ تێکدانا وێ دەرفەت و سەقایێ بۆ چارەسەرکرنا ئاریشێن وەلاتی، ب تایبەت ئاریشەیێن هەولێر و بەغدا دروست بووین و ئارامییا سیاسی یا عیراقێ ئە ئێخیتە د مەترسیێ دا”.
سەرۆکێ هەرێما کوردستانێ دەربارەی بڕیارا دادگەها فیدڕالی یا عیراقێ د ڤێ دەمیدا بەرچاڤکریە،”ژبلی گومان و ب دەهان نیشانانێن پرسیارێن مەزن دروست دکەت، هەروەسا بابەتێ بلەزکرن د دەکەفتنا یاسایەکا نوو بۆ دووبارە دامەزراندنا دادگەها فیدڕالی د ئینیتە پێش، وەکو پشکەکا گرنگ و سەرەکی یا ڕێککەفتنا لایەنێن سیاسی بۆ دامەزراندنا حکومەتا نوو یا فیدڕال یا عیراقێ.”
