د. نه‌وزاد هێتۆتی: هه‌كه‌ سه‌رۆك وه‌زیرین عیراقێ كه‌سه‌كێ میانره‌و ژی بیت نه‌شێت ئاریشان چاره‌سه‌ر بكه‌ت

زنار تۆڤی ” ئاژانسا خانی:

ئه‌مریكا دڤێت عیراق خۆ ژ ئیرانێ دوور بكه‌ت و نه‌بیته‌ پشكه‌ك ژ سییاسه‌ت و كارناما ئیرانێ ” هه‌روه‌سا د نوكه‌ دا فشارێن ئه‌مریكا سەر حكومەتا محەمەد شیاع  سوودانی پتر لێ دهێن” ژ پیێخه‌مه‌ت نه‌هێلێت دۆلار ژ عیراقێ بچیته‌ ئیرانێ.

د. نه‌وزاد هێتۆتی” مامۆستایێ زانستێن سیاسی ل زانكۆیا سه‌لاحه‌دین ل هه‌ولێرێ” د دیداره‌كێ دا بۆ ئاژانسا خانی دیار كر: گه‌له‌ك یا ب زه‌حمه‌ته‌ ل ژێر دەستهه‌لاتا  گرۆپێن میلیشیاتان و ھەبوونا دەولەته‌كا پری ئالۆزی ل عیراقێ، هیچ ئاریشەك ل گەل بەغدا بهێته‌ چارەسەر كرن” هه‌كه‌ سەرۆك وەزیرێن عیراقێ كەسه‌كێ میانرەو ژی بیت” یان ژی نییەتا خێرێ ھەبیت و ئاریشان چارەسەر بكه‌ت” وه‌ كو دیار پرانییا ھێزێن دناڤا چارچۆڤێ ھەماھەنگییێ سەر ب ئیرانێ ڤه‌نه‌ و سیاسەتا ئیرانێ بجهـ دئینن” ئەو ل گەل چارەسەریییا ئاریشان نینن ل گەل ھەرێمێ و ئەو  رێككەفتنا بۆ پێكئینانا حكۆمەتێ هاتییه‌ كرن ژی پتر یا تەكتیكی بوویه‌” هه‌روه‌سا بۆ كورد و سووننیان باشتر بوو” رێككەفتنێ ل گەل گرۆپێن چارچۆڤێ ھەماھەنگییێ نه‌كه‌ن” به‌لێ مخابن ئەو ریككەفتنە هاته‌ كرن” نوكه‌ دادگه‌ها فیدرالی ل بەردەستێ وان دایه‌ و وەكو ئامرازه‌كێ كاریگەر ل دژی كورد و سوننیان ب كار دئینن و وەكو به‌هانه‌یه‌كێ ژی بكار دئینن بۆ خۆ ڤه‌دزینێ ژ پراكتیزەكرنا وان رێككەفتنێن هاتینه‌ كرن.

 ناڤهاتی گۆت ژی: پشتی ھه‌لبژارتنێن 2021 ێ” وان ئه‌و دادگایە ل دژی پرۆسا سیاسی، كورد و سەدرییان بكار ئینا و پرۆسا ھەلبژاتنان ئیفلیج كر و وان رێك بۆ خۆ خۆش كر بۆ هندێ كو ئه‌و حكومەتێ پێك بینن” ھەر چەندە كورد و سوننی دشییان حكومه‌تا عیراقێ نه‌هێته‌ پێكئینان” بەلێ كەفتنە ژێر كاریگەرییا سۆزێن وان یێن بێ ناڤه‌رۆك و تەكتیكێن وان گرۆپێن شیعی” وه‌كو دیار هه‌تا نوكه‌ ئێك خال ژی ژ داخوازی یێن كورد و سوننیان نه‌هاتینه‌ بجهئینان” دڤێت چاڤەرێی هندێ بكەین كو چارەنڤیسێ یاسایا نەفت و گازێ ژی كو بریار بوو د شه‌ش مه‌هان دا پشتی دەست بكار بوونا حكۆمەتا نوو ژ پەرلەمانێ عیراقێ بهێته‌ دەرباز كرن” كو ب دەردێ شایستێن دارایی یێن ھەرێمێ بچییت” چونكی وان بریارا دادگه‌هێ ھەیە و ب وێ به‌هانه‌یێ ئه‌و خۆ ژ دەركرنا ھەر جورە یاسایەكێ ڤه‌دزن كو دژی بریارا دادگه‌ها دەستووری بیت” هه‌روه‌سا نوكه‌ فشارێن مه‌زن ل سه‌ر سه‌رۆكوه‌زێرین عیراقی هه‌یه‌ ژ ئه‌گه‌رێ بلندبوونا بھایێ دۆلار و دبیت ئه‌ڤه‌ ژی یارییه‌كا ئیرانێ و ھێزێن شیعی بیت بۆ تێكەلكرنا كارتان و ژناڤبرنا سەرنجان ل سەر قەیرانێن داكه‌فتنا بھایێ دراڤێ عیراقی.