ئه‌ڤرۆ ل سه‌لاحه‌دین سه‌رۆك مه‌سعود بارزانى پێشوازى ل شانده‌كێ بلند یێ حزبا شوعى ل چینێ كر، كو پێكهاتنبوون ژ سه‌رۆكێ شاندى (جوو روى) كو هاریكارێ وه‌زیره ل پشكا ناڤده‌وله‌تى یا كۆمیته‌یا ناڤه‌ندییا حزبا شوعى ل چینێ و (چوو وه‌ى) بالیۆزێ چینێ ل عیراقێ و (لیو زین یونگ) كۆنسولێ چینێ ل باژێرێ هه‌ولێرێ و هژماره‌كا به‌رپرس و شیره‌تكارێن حزبا شوعى ل چینێ.
د دیدارێدا (جوو روى) سه‌رۆكێ شاندى كورتیه‌ك ل سیاسه‌ت و جیهانبینى یا حزبا شوعى ل چینێ پشتى كۆنگرێ بیستێ یێ حزبا وان، كو ژ بابه‌تێن جیهانى و هه‌رێمایه‌تى و هه‌روه‌سا ره‌وشا پێشكه‌فتن و گهۆرینێن نافخۆ یێن وه‌لاتێ چینێ بۆ سه‌رۆك بارزانى دیاركرن.
هه‌روه‌سا ئاماژه ب خالێن هه‌ڤپشك یێن دناڤبه‌را پارتى دیموكراتى كوردستان و حزبا شوعى ل چینێ كر، داخازكر په‌یوه‌ندیێن دناڤبه‌را هه‌ردوو لایان بهێزبن ب تایبه‌ت لێكگوهاتنا ئه‌زمون و شاره‌زایان د بوارێ ئیدارى و حكومرانى و بازرگانى و ئابوورى دا.
هه‌ر د كۆمبوونێدا سه‌رۆك بارزانى بخێرهاتنا شاندى كر، سه‌ره‌رایى ئاماژه‌دان ب په‌یوه‌ندیێن دیروكى یێن دناڤبه‌را پارتى و حزبا شوعى ل چینێ و دوپاتى ل هندێ كر، كو پارتى و حزبا شوعى یا چینێ ب ره‌سه‌نایه‌تى و بهێزبوونا جه‌ماوه‌رێ خۆ شیاینه ب رێكا خه‌باتا خۆ، لسه‌ر زه‌حمه‌تى و ته‌حه‌دایێن ژیانێ سه‌ربكه‌ڤن.
