جەعفەر میعادفەر سه‌رۆكێ رێكخراوا هه‌وارهاتنا ئیرانێ راگه‌هاند، د رێوره‌سمێن چارشه‌مبیا سوردا 27 كه‌سان ل رۆژهه‌لاتێ كوردستان و ئیرانێ گیانێ خۆ ژده‌ستدان.
د رێوره‌سمێن چارشه‌میا سور یا ئه‌ڤساله یا جیاوازبوو، و پشكه‌ك ژ باژێرێن رۆژهه‌لاتا كوردستان و ئیرانێ خه‌لكى دژى ده‌ستهه‌لاتێ دروشم رادكرن و ل هنده‌ك جهان شه‌ر و ئالووزى دروستبوون.
دیار ژى كر، 222 كه‌سان ئه‌ندامێن له‌شێ خۆ ژده‌ستداینه، 25 كه‌س ل بن چاڤدێریا چڕ دانه و 357كه‌سان زیان ب چاڤێن وان كه‌فتینه و 867 كه‌س ژى یێن هاتینه سووتن.
ل دویڤ راپۆرتا رێكخراوا هه‌وارهاتنا بله‌ز یا ئیرانێ ، ل ته‌هران، ته‌بریز،ورمێ، كرماشا، لورستان و سنه، 2 هزار و 134 كه‌س بریندار بووینه.
رێوره‌سمێ چارشه‌مبیا سور ل ئیڤاریا دوهى هاته‌كرن، به‌رى نوكه د رێوره‌سمێدا تنێ ئاگر دهاته هه‌لكرن و خه‌لك ل ده‌وروبه‌رێن ئاگرى كۆمبوون و خۆ د سه‌ردا دهاڤێت، به‌لێ ئه‌ڤه چه‌ند ساله یاریێن ئاگری بكار دئینن و ئه‌ڤه بوویه ئه‌گه‌ر كو ب ده‌هان كه‌س سالانه گیانێ خۆ ژده‌ستدده‌ن و برینداردبن.
