مەسرور بارزانی سەرۆکێ حکومەتا هەرێمێ د هەڤپەیڤینەکێدا ل گەڵ ماڵپەڕێ مۆنیتۆر کو ئەڤرۆ هەینی، 17-3-2023، هاتییە بەلاڤکرن، گۆتییە: “هیڤیدارم تیما ئێکەتییێ ڤەگەرنەڤە ناڤا حکومەتێ. ئەوان [وەزیرێن ئێکەتیی] ل پەرلەمان و ل هەمبەری گەلێ کوردستانێ سویند خارییە. ئەو نەشێن ب ڕەڤین و نە هەلگرتنا بەرپرسیارێتییان پرسان چارەسەر بکەن”.
سەرۆکوەزیرێن هەرێما کوردستانێ داخازێ ژ تیما ئێکەتییێ دکەت ڤەگەرنەڤە ناڤا کۆمبوونێن جڤاتا وەزیران و دبێژیت: ” پێدڤییە سەرنجا وان ل سەر چارەسەرکرنا پرسێن سیاسی و ئابووری بیت ب ڕێکا جڤاتا وەزیران و رێکێ ب دادگە و سیستەمێ سیاسی ژی بدەن مامەڵەیێ ل گەڵ کەیسا کوشتنا “هاوکار جاف” بکەت، نەک هەموو پرسان پێکڤە تێکەڵ بکەن”.
مەسرور بارزانی گۆتییە ژی: “د کۆمبوونێن جڤاتا وەزیراندا ب شێوەیەکێ فەرمی من داخاز ژ ئێکەتییا نیشتمانییا کوردستانێ کرییە ڤەگەرنەڤە ناڤا حکومەتێ. لەوڕا، هیڤیدارم ڤەگەرنەڤە و ل وێرێ دانوستاندنێ ل سەر ئاریشەیان بکەن.
