سوودانی بۆ ماکرۆنی: دەرگەهێ عیراقێ بۆ وەبەرهێنانا هەڤپشک یا ئابووری یێ ڤەکریە

ماکرۆن و سوودانی پەیوەندیا تەلەفۆنی ئەنجامدا و باس ل بابەتێن ئابووری یێن دناڤبەرا پاریس و بەغدا دا کر.

ئەڤرۆ 20 ئادارا 2023، محەمەد شیاع سوودانی، سەرۆکوەزیرێن عیراقێ پەیوەندییا تەلەفۆنی دگەل ئیمانوێل ماکرۆن، سەرۆکێ فەرەنسا ئەنجامدا.

نڤیسینگەها ڕاگەهاندنا سەرۆکوەزیرێن عیراقێ بەلاڤکریە، د پەیوەندیەکا تەلەفۆنیدا، هەردوو لا دوپاتی ل سەر بهێزکرنا پەیوەندییێن دوو قولی و بەردەوامیدان ب کارێن هەڤپشک یێن ئابووری و بەڕژەوەندییێن دناڤبەرا هەردوو لایان دا کر.

د ڕاگەهاندنێدا هاتیە، د چوارچوڤێ بەرنامەیەکێ کاریگەر یێ ئابووری و خزمەتگوزاریدا، سوودانی پشتڕاستبوون دایە ماکرۆنی کو عیراق دێ دەرگەهێ وەبەرهێنانێ و هەڤپشکییا ئابووری ل هەمبەری هەمی دوستێن خۆ ڤەکەت.