<h2>شه‌مۆ قاسم، شارەزا و نڤیسەر د بوارێ ئێزدیاتیێدا بۆ ئاژانسا خانی ڕاگەهاند، جه‌ژنا چارشه‌مبا سۆر ل هه‌مى سالان چارشه‌مبا ئيكێ يا هه‌يڤا نيسانێ لدووڤ سالناما كوردى دهێتە‌كرن و ئه‌ڤێ جه‌ژنێ چه‌ندين رێوره‌سمێن تايبه‌ت هه‌نه ژ وان ژی كو ل سپێده‌هییا جه‌ژنێ مالێن ئيزدى كوليلكێن نیسانێ یێن سۆر ب هنده‌ك هه‌ریێ یان ژى ب هه‌ڤیرى ب ده‌رگه‌هێ خۆ ڤە دكه‌ن و قالكه‌كا هێكێ دانه سه‌ر هه‌ڤیرى، هه‌روه‌سا گیایه‌ك یێ هه‌ى ب ناڤێ بێناڤ ئه‌وى گیایى ژى ب ده‌رگه‌هێن مالێ ڤه دكه‌ن، ئه‌و چه‌نده نيشانه بۆ هندى كو ئه‌ڤ ماله ئيزدى يه و ده‌سپێكا بهارێ یه.</h2> <h2>شه‌مۆ قاسم گۆت:" شڤان سپێده‌هییا جه‌ژنێ په‌زى ژ كوتانى ده‌ردئێخن و به‌رخكا به‌رده‌نه دناڤ په‌زى و دبێژنێ شیرێ ئه‌ڤرۆ به‌رهرا به‌رخی یه ئه‌ڤه رێزگرتنه بۆ گیانه‌وه‌رى، هه‌روه‌سا پشتى نیڤرۆ بێریڤان دێ چن و گه‌هنه شڤانى دێ گوپالى ژێ وه‌رگرن و دێ پرت پرت كه‌ن، هه‌ر بێریڤانه‌ك دێ پرته‌كا وى گۆپالى ل ده‌ف خۆ هه‌لدگریت و ده‌مێ ڤه‌گه‌ریانێ ب مه‌شكا خۆ ڤه‌دكه‌ن ب مه‌ره‌ما هەیڤا خێر و به‌ره‌كه‌تێ".</h2> <h2>شارەزا و نڤیسەر د بوارێ ئێزدیاتیێدا زێدەتر دیاركر، د جه‌ژنێدا هێك دهێنه ره‌نگرن، رامان ژ كه‌لاندنا هێكێ گویا ئه‌ردى یه و ره‌نگكرنا هێكێ جوانیا سرۆشتیه و ل ئێڤارییا جه‌ژنێ بابه شێخ و كه‌سانێن دگه‌لدا دچنه په‌رسگه‌ها لالش و 365 شه‌مالكان هه‌لكه‌ن رامان ژێ 365 رۆژێن سالێ نه ئانكو سالا نوى دێ ده‌سپێكه‌ت، هەروەسا ژنك ژی خارنێن خۆ حازردكه‌ن و سپێده‌هییا جه‌ژنێ دچنه گورستانان و زه‌لام دچنه مه‌زارگه‌هێن گۆندى و جه‌ژنا ئێكودو پیرۆزدكه‌ن، مه‌ره‌م ژ چوونا ژنان بۆ گورستانان ژبه‌ركو پتر گرێداى مریێن خۆ و بیرهاتنایه و خارنێ دده‌نه فه‌قیران.</h2>
