پەرلەمانتارەکا پارتی ل پەرلەمانێ عێراقێ ئاشکرا کر، ئێک دەنگییەک ل سەر دەربازکرنا پڕۆژە قانوونا بوودجەیی ھەیە و چ ئاریشە ل سەر پشکا ھەرێما کوردستانێ نابن و پشتی جەژنێ ئێکسەر وەک خوە بودجە دێ ھێتە پەسەند کرن.
جوان عەبدوللا، ئەنداما فڕاکسیۆنا پارتی ل پەرلەمانێ عێراقێ بۆ ئاژانسا خانی دیار کر” ل شەڤا بوری خواندنا دویێ بۆ پڕۆژە قانوونا بوودجێ عێراقێ ھاتییە کرن و بڕیارە پشتی جەژنا رەمەزانێ و ل دەمەکێ نێزیک بوودجە بھێتە پەسەند کرن و بەرھەڤی بۆ خواندنا سێیێ دھێنە کرن، پشتی جەژنێ دێ قانوونا بوودجەیی ھێتە پەسەند کرن و ئێک دەنگییەک ھەیە بۆ دەربازکرنا قانوونا بوودجەیی، ب تایبەتی بودجە بۆ سێ سالانه.
ناڤهاتییێ گۆت ژی”بەری پڕۆژە قانوونا بوودجەیی بھێتە پەرلەمانی رێکكەفتنا سیاسی ل سەر ھاتییە کرن و ھەرێم و بەغدا ژی گەھشتینە رێکكەفتنێ بۆ دیارکرنا پشکا ھەرێما کوردستانێ، ھەتا نوکە چ ئاریشە پەیدا نەبووینە ل دۆر پشکا ھەرێما کوردستانێ و ئەز باوەر ناکەم ئاریشە ل سەر ھەبن، چونکی رێکكەفتن ل سەر ھەیە و ھەرێما کوردستانێ رێکكەفتن کرییە كو چەند داھات ل بەغدا بھێت و ھەمبەر دا نەفت دێ ھێتیە رادەستکرن.
