وه‌زاره‌تا دارایى ئاشكراكر، ئاماده‌كارى دهێنه‌كرن ژبۆ هندێ ل ده‌ستپێكا مه‌ها پێنج خشته‌یێ مووچه‌یى رابگه‌هینن.
هونه‌ر جه‌مال په‌یڤدارێ وه‌زاره‌تا دارایى و ئابوورییا هه‌رێما كوردستانێ راگه‌هاند، وه‌زاره‌تا سامانێن سروشتى پشكه‌ك ژ داهاتێ په‌ترۆلێ ئێخستییه ل سه‌ر هژمارا بانكا وه‌زاره‌تا دارایى، و بزاڤ دهێنه‌كرن ب داهاتێ سامانێن سروشتى و 400 ملیارێن قه‌رێن به‌غدا و داهاتێ نافخۆ و هاریكاریێن هه‌ڤپه‌یمانان، مووچه‌یێ مه‌ها چار بهێته دابینكرن.
ناڤبرى دوپاتى ل هندێ كر، وه‌زاره‌تا سامانێن سروشتى داهاتێ په‌ترۆلا 24 رۆژێن مه‌ها سێ بۆ ڤه‌گه‌راند، به‌لێ د نوكه‌دا پشكه‌ك ئێخستیه ل سه‌ر هژمارا بانكى ل وه‌زاره‌تا دارایى.
دیار ژى كر، پشتى بهێنڤه‌دانا جه‌ژنێ ئاماده‌كارى دهێنه‌كرن ژبۆ هندێ پشكه‌كا دى یا داهاتێ په‌ترۆلێ بگه‌هیته وه‌زاره‌تێ، و ل ده‌ستپێكا مه‌ها پێنج خشته‌یێ مووچه‌یى رابگه‌هینن.
