ڤه‌كۆله‌ره‌كێ بریتانى د لێكۆلینه‌كێدا بۆ ده‌ركه‌ڤت، كرێكارێن بیانى ب تایبه‌تى ده‌ستێ كارى یێ ژنان هه‌ست ب سه‌قامگێرى و ئاسایشێ ل هه‌رێما كوردستانێ دكه‌ن، و ڤێ چه‌ندێ ب ئه‌گه‌ره‌كێ گرنگ بۆ سه‌ره‌دانكرنا هه‌رێمێ ب مه‌ره‌ما كاركرنێ دزانن.
پرۆفیسۆر ئیلینیۆر كۆفمان مامۆستایه ل زانكۆیا میدلسێكس ل وه‌لاتێ بریتانیا و ڤه‌كۆلینێن وى تیشكێ دئێخنه ل سه‌ر كۆچا ده‌ستێ كارێ بیانى یێ ژنان و بابه‌تێن وه‌لاتیبوونێ.
ئه‌وى ئه‌كادیمێستى د كۆنفرانسێ ڤه‌كۆلینا كوردى ل زانكۆیا له‌نده‌ندا بۆ ئابوور و زانستێن سیاسى به‌حس ل هندێ كر، ئه‌وى بۆ لێكۆنان چه‌ندین دیدار دگه‌ل كرێكارێن بیانى ل باژێرێن دهۆك و هه‌ولێرێ كرینه، و كرێكاران دیاركرییه، ئه‌و هه‌ست ب ئاسایش و ئارامییێ ل هه‌رێما كوردستانێ دكه‌ن، سه‌ربارى كو ل ده‌ستپێكێ وان هه‌ست ب مه‌ترسییێ دكر ده‌مێ زانى كو هه‌رێما كوردستانێ پشكه‌كه ژ عیراقێ و یا مه‌ترسیداره، لێ ده‌مێ گه‌هشتینه هه‌رێمێ هه‌ست ب سلامه‌تییێ كر.
پروفیسۆر ئیلینیۆر كۆفمانى گوت: بابه‌تێ ئاسایشێ ل ده‌ڤ كرێكارێن بیانى گه‌له‌ك یێ گرنگه، و ئه‌گه‌ر ئه‌و ئاسایش و ئارامییه نه‌بان، ئه‌و د ئاماده‌نه‌بوون ل هه‌رێما كوردستانێ بمینن، كو ئه‌وى ڤه‌كۆله‌رى پشتى چه‌ند سالان دیدار دگه‌ل هه‌مان كرێكاران كر دا بزانیت كا بوچوونێن وان هاتینه گوهۆرین یان نه و ده‌ركه‌ڤت هه‌ر ل سه‌ر بوچوونا خوه‌نه و كارێ خوه دكه‌ن.
دهێته زانین زێده‌تر ژ 30 هزار كرێكارێن بیانى ل هه‌رێما كوردستانێ هه‌نه و د چه‌ندین بوارێن جۆدا دا كاردكه‌ن، و پشكه‌ك ژ وان كرێكاران ژ وه‌لاتێن جیرانێن عیراقێ هاتینه، و ژماره‌كا مه‌زن ژى خه‌لكێ وه‌لاتێن باشوورێ ئاسیانه وه‌كو فلیپین و به‌نگلادش.
