شانده‌كێ حكومه‌تا عیراقێ دێ بۆ بابه‌تێ وه‌رگرتنا گه‌نمێ جووتیاران سه‌ره‌دانا هه‌رێما كوردستانێ كه‌ت

بریاره‌ سوبه‌هى رۆژا ئه‌ینى شانده‌كێ حكومه‌تا عیراقێ سه‌ره‌دانا هه‌ولێرێ بكه‌ت و بابه‌تێ وه‌رگرتنا گه‌نمێ جووتیاران و مووچه‌یێ كارمه‌ندێن سایلۆیان و ڤه‌كرنا دوو بنگه‌هێن وه‌رگرتنا گه‌نمێ جووتیاران گوتوبێژبكه‌ت.

كه‌مال موسلم وه‌زیرێ بازرگانییا حكومه‌تا هه‌رێما كوردستانێ دیاركر، شاندێ عیراقێ ژ سه‌رۆكایه‌تییا رێڤه‌به‌رێ گشتییێ كۆمپانییا بازاركرنا ده‌خلۆدانى و چه‌ند رێڤه‌به‌رێن ته‌كنیكى و كارگێرى و ژمێریارى یێن وێ كۆمپانییێ پێكدهێت.

وه‌زیرێ بازرگانییا هه‌رێما كوردستانێ ئاشكراكر، شاندێ عیراقێ سوبه‌هى بۆ دیاركرنا دوو جهان بۆ وه‌رگرتنا گه‌نمێ جووتیاران دێ سه‌ره‌دانا كۆیه‌ و هه‌ریر كه‌ت داكو دوو بنگه‌هان بۆ وه‌رگرتنا گه‌نمێ جووتیاران دیاربكه‌ت.

ئاماژه‌ ب هندێ ژى دا، ئه‌و شانده‌ بۆ چاره‌سه‌ركرنا ئاریشه‌یا وه‌رگرتنا گه‌نمێ ئه‌ڤساله‌ ژ جووتیاران و مووچه و شایسیته‌یێن دارایى یێن كارمه‌ندێن بنگه‌هێن وه‌رگرتنا گه‌نمى سه‌ره‌دانا هه‌رێما كوردستانێ كه‌ت.