نێچيرڤان بارزانى پێشوازى ل‌ شاندێ كۆلیژه‌كا سه‌ربازيیا عێراقى كر

ئه‌ڤرۆ ئێكشه‌مبی ‌2023/5/7 ێ” نێچيرڤان بارزانى، سه‌رۆكێ هه‌رێما كوردستانێ، پێشوازى ل‌ شانده‌كێ كۆلێژا به‌رگرییا نيشتمانی یا سه‌ر ب‌ زانكۆىا به‌رگرییێ بۆ خواندنا بلندا سه‌ربازى كر كو سازییه‌كا‌ زانستى و مه‌شق و راهێنانێ یا سه‌ر ب‌ وه‌زاره‌تا به‌رگريیا عێراقێ یه‌ و قوتابی یێن وێ ژ‌ پله‌دارێن سه‌ربازى و به‌رپرس و شیره‌تكاران و رێڤه‌به‌رێن وه‌زاره‌تێ و سازی یێن‌ حكومی پێكهاتینه‌ و د بیاڤێن به‌رگرىیێ و برێڤه‌برنێ دا باوه‌رنامێ ب‌ ده‌ستڤه‌ دئینن.

نێچيرڤان بارزانى زێده‌باری ده‌ربرینا خۆشحالییێ ب‌ سه‌ره‌دانا وی شاندی‌ بۆ هه‌رێما كوردستانێ، پێشڤه‌برنا په‌يوه‌ندييان دناڤبه‌را ده‌زگه‌هـ و سازی یێن د بیاڤێ به‌رگرى و سه‌ربازى و هه‌موو بیاڤێن ديتر ل هه‌موو عێراقێ ب هه‌رێما كوردستانێ ڤه‌، ب‌ گرنگ ل‌ قه‌له‌م دا” هه‌روه‌سا په‌يڕه‌و و پرۆگرامێن خواندنێ ل وێ زانكۆیێ و پشك و كۆلێژێن ل ‌سه‌ر بنه‌مایێ نيشتمانى و زانستی ب پێدڤی و ئه‌رێنى هه‌لسه‌نگاندن.

گۆت ژی” پشتى بيست سالان ژ ئازاديیا عێراقێ، دڤێت مفایی ژ خه‌له‌تی یێن بوری وه‌ربگرین، ب دیتن‌ و به‌رنامه‌كێ‌ روون و هه‌ڤپشك یێ كۆمكری‌،‌ پێنگاڤێن باشتر به‌ره‌ف داهاتی بهاڤێژین و هه‌موو پێكهاتێن عێراقێ پێكڤه‌ د‌ رێڤه‌برن و ئاڤاكرنا وه‌لاتی دا هه‌ڤپشك و پشكدار بن.

وی شاندی‌ خۆشحالییا خۆ‌ ب سه‌ره‌دانا خۆ و پێشكه‌فتنێن هه‌رێما كوردستانێ ده‌ربرى، هه‌روه‌سا سوپاسییا ڕۆل و گوتار و ڕوانگه‌ها نيشتمانيیا سه‌رۆكێ هه‌رێما كوردستانێ ل سه‌ر ئاستێ عێراقێ ب ‌گشتى كر.