سهرۆكێ ههرێما كوردستانێ پێشوازى ل شاندهكێ كۆلیژا بهرگرییا نیشتیمانییا سهر ب زانكۆیا بلندا سهربازییا عیراقێڤه كر و راگههاند، پشتى 20 سالان ژ ئازادییا عیراقێ، پێدڤییه پێنگاڤێن باشتر بۆ پاشهرۆژێ بهێنه هاڤێتن و ههموو پێكهاتهیێن عیراقێ پێكڤه د رێڤهبرن و بنیاتدانانا وهلاتیدا ههڤپشك و پشكداربن.
نێچیرڤان بارزانى سهرۆكێ ههرێما كوردستانێ ل ههولێرێ پێشوازى ل شاندهكێ كۆلیژا بهرگرییا نیشتیمانییا سهر ب زانكۆیا بهرگرییێ بۆ خۆاندنا بلندا سهربازی كر كو دامهزراوهیهكا زانستى و مهشق و راهێنانێن سهر ب وهزارهتا بهرگرییا عیراقێڤهیه و ژ قوتابییێن پلهیێن سهربازى و بهرپرس و شیرهتكاران و رێڤهبهرییا وهزارهت و دامهزراوهیێن حكومى پێكهاتییه و دبوارێ بهرگرى و پێشڤهبرنێدا باوهرنامهیان بدهستڤهبهن.
ل دووڤ راگههاندنهكا سهرۆكایهتییا ههرێما كوردستانێ، نێچیرڤان بارزانى زێدهبارى دهربرینا خۆشحالییا خوه ب سهرهدانا شاندى، پێشڤهبرنا پهیوهندییێن دناڤبهرا دهزگههـ و دامهزراوهیێن بوارێن بهرگرى و سهربارى و ههموو بوارێن دى ل ههموو عیراق و ههرێما كوردستانێ ب گرنگ ل قهلهمدا، ههروهسا سهرۆكێ ههرێما كوردستانێ پهیرهو و پرۆگرامێ خواندنێ ل زانكۆیان و پشك و كۆلیژان ل سهر بنهمایێن نیشتیمانى و زانستى ب پێدڤى و ئهرێنى ههلسهنگاند.
نێچیرڤان بارزانى دووپاتى ل هندێ كر، پشتى 20 سالان ژ ئازادییا عیراقێ، دڤێت ب مفا وهرگرتن ژ شاشییێن بوورى، ب رهوانگه و بهرنامهیهكێ روون و ههڤپشك پێنگاڤێن باشتر بۆ پاشهرۆژێ بهێنه هاڤێتن و ههموو پێكهاتهیێن عیراقێ پێكڤه درێڤهبرن و بنیاتدانانا وهلاتیدا د ههڤپشك هاریكاربن.
وهكو دراگههاندنێدا هاتى، شاندى خۆشحالییا خوه ب سهرهدانێ و پێشكهڤتنێن ههرێما كوردستانێ دهربرى، ههروهسا سوپاسییا رۆل و گوتار و رهوانگهها نیشتیمانییا بهرێز سهرۆكێ ههرێما كوردستانێ ل سهر ئاستێ عیراقێ ب گشتى كر.
دپشكهكا دییا دیدارێدا دانوستاندن ل دۆر چهندین بابهتێن ئێمناهى و سهربازى هاته كرن.
