سه‌رۆكێ حكومه‌تێ پێشوازى ل شانده‌كێ جڤاتا بازرگانییا ئه‌مریكا – كوردستان كر

سه‌رۆكێ حكومه‌تا هه‌رێما كوردستانێ د په‌راوێزا پێشوازیكرنا شانده‌كێ جڤاتا بازرگانییا ئه‌مریكا – كوردستانێدا دووپاتى ل هندێ كر، هه‌رێما كوردستانێ هه‌موو ئه‌رك و پابه‌ندییێن خوه‌ ژ چارچووڤێ ده‌ستوورى و رێككه‌ڤتنان بجهئیناینه‌ و دخوازیت حكومه‌تا فیدرالى ژى مافێن ده‌ستوورى یێن هه‌رێما كوردستانێ پێشێل نه‌كه‌ت.

مه‌سرور بارزانى سه‌رۆكێ حكومه‌تا هه‌رێما كوردستانێ پێشوازى ل شانده‌كێ جڤاتا بازرگانییا ئه‌مریكا – كوردستان كر.

ل ده‌ستپێكا كۆمبوونێ ده‌یڤد ته‌فورى سه‌رۆكێ جڤاتێ كورتییه‌ك ده‌رباره‌ى ئارمانجێن سه‌ره‌دانێ و پێكهاته‌یێ شاندى خواند، ئاماده‌ییا خوه‌ ژى بۆ پێشڤه‌برنا كار و وه‌به‌رهێنانێ ل هه‌رێما كوردستانێ ده‌ربرى.

سه‌رۆكێ حكومه‌تێ تیشك خسته‌ سه‌ر دووماهى گوهۆرین و پێشهاته‌یێن هه‌رێما كوردستانێ و په‌یوه‌ندییێن دگه‌ل حكومه‌تا فیدرال، ئاماژه‌ ب هندێ دا كو هه‌رێما كوردستانێ هه‌موو ئه‌رك و پابه‌ندییێن خوه‌ ژ چارچووڤه‌یێن ده‌ستوورى و رێككه‌ڤتنان بجهئیناینه‌ و دخوازیت حكومه‌تا فیدرال ژى مافێن ده‌ستوورى یێن هه‌رێما كوردستانێ پێشێل نه‌كه‌ت.

د ته‌وه‌ره‌كێ دییێ كۆمبوونێدا، دانوستاندن ل دۆر ره‌وشا پێكڤه‌ژیانا ئاشتیانه‌ یا پێكهاته‌یان ل هه‌رێما كوردستانێ هاتنه‌كرن، دڤى بیاڤیدا سه‌رۆكێ حكومه‌تێ پابه‌ندبوونا حكومه‌تا هه‌رێما كوردستانێ ب قه‌بوولكرن و پێڤشه‌برنا كولتوورێ پێكڤه‌ژیانا نه‌ته‌وه‌یى و ئایینى و ئازادییا ئایینى و پاراستنا مافێن پێكهاته‌یێن جوودا دووپاتكر.

شاندێ مێڤان په‌سنا چاكسازییێن حكومه‌تا هه‌رێما كوردستانێ ب تایبه‌تى ئاسانكاریكرن بۆ وه‌به‌رهێنه‌ران و دیجیتاكرنا خزمه‌تگوزارییان و پرۆسه‌یا ڤیزه‌یا ئه‌لكترۆنى كر.