<h3 style="text-align: justify;"><span style="font-size: 18pt;">ئه‌ندامه‌كێ ئێكه‌تییا فوتبۆلا عیراقێ دیاركر، كۆما عیراقێ دكۆپا ئاسیادا یا هه‌ڤسه‌نگه و ئارمانجا وان ئه‌وه بگه‌هنه قووناغێن پێشكه‌ڤتى ژ قاره‌مانییێ.</span></h3> <h3 style="text-align: justify;"><span style="font-size: 18pt;">دپشككێشانا كۆپا ئاسیا 2023ێدا هه‌لبژارتییێ عیراقێ كه‌ڤته د كۆما چارێدا دگه‌ل هه‌لبژارتییێ ژاپۆن، ڤێتنام و ئیندونیسیا.</span></h3> <h3 style="text-align: justify;"><span style="font-size: 18pt;">ل دۆر ڤێ چه‌ندێ د.گوڤه‌ند عه‌بدلخالق ئه‌ندامێ ئێكه‌تییا فوتبۆلا عیراقێ بۆ ئاژانسا خانى راگه‌هاند، كۆما عیراقێ یا هه‌ڤسه‌نگه، ئاسته‌نگا سه‌ره‌كى دڤێ كۆمێدا ژاپۆنه كو هه‌لبژارتییێ ژماره ئێكه ل ئاسیا، لێ هه‌ر تیمه‌كا بڤێت بهێز بكه‌ڤیت و بگه‌هیته قووناغێن پێشكه‌ڤتى، دڤێت رووبروو هه‌لبژارتییێن وه‌كو ژاپۆنێ ببیت، و عیراق دێ هه‌موو بزاڤان كه‌ت وه‌كو خودانا رێزا ئێكێ ژ كۆما خوه ده‌رباز بیت.</span></h3> <h3 style="text-align: justify;"><span style="font-size: 18pt;">ل دۆر به‌رهه‌ڤییێن عیراقێ بۆ قاره‌مانییا چاڤه‌رێكرى گوڤه‌ندى ئاشكراكر، به‌رهه‌ڤییێن عیراقێ ژ كۆپا كه‌نداڤییا بوورى ده‌ستپێكرینه، ل ده‌مێن بهێن دێ كه‌مپه‌كێ راهێنانان ل ئسپانیا دانیت، یارییه‌كا هه‌ڤالینى دگه‌ل هه‌لبژارتییێ كۆلۆمبیا كه‌ت، ئه‌و دێ ل دووڤ داخوازا راهێنه‌رى چه‌ند یارییه‌كێن دى یێن هه‌ڤالینى رێكئێخن و دبیت یارییێن هه‌ڤالینى دگه‌ل ڤێتنام و ئیندونیسیا ژى بكه‌ن.</span></h3> <h3 style="text-align: justify;"><span style="font-size: 18pt;">زێده‌تر گوڤه‌ندى سه‌باره‌ت راهێنه‌رێ ئسپانى خیسۆس كاساسى گوت: كاساس راهێنه‌ره‌كێ مه‌زنه و ئه‌و ژ كارێ وى د رازینه، یاریكه‌ران حه‌زه‌كا مه‌زن بۆ هه‌ڤركیكرنێ دكوپا ئاسیادا هه‌یه و ئارمانجا وان ئه‌وه هه‌ڤركییه‌كا بهێز بكه‌ن و ب كار ل سه‌ر هندێ كه‌ن كو عیراق بگه‌هیته یارییا دووماهییێ.</span></h3> <h3 style="text-align: justify;"><span style="font-size: 18pt;">ده‌رباره‌ى یاریكه‌رێن پیشه‌كارێن عیراقێ ئاشكراكر، هه‌ر یاریكه‌ره‌كێ ب رێژه‌یا 100%ێ حه‌زا یاریكرنێ بۆ هه‌لبژارتییێ عیراقێ هه‌بیت، دێ ل هزرا ئێكه‌تییێ بیت و په‌یوه‌ندى پێ هێته‌كرن.</span></h3>
