په‌رله‌مانتاره‌ك: بودجەكێ تایبەت بۆ ده‌ڤه‌رێن کوردستانی هاتییه‌ دیار کرن

ئاژانسا خانی:

ئەندامه‌كێ لژنا ھەرێم و پارێزگه‌هان ل پەرلەمانێ عێراقێ ئاشکرا کر، دناڤا پرۆژە قانوونا بودجێ گشتی یێ عێراقێ دا بودجەكێ تایبەت بۆ ئاڤەدانکرنا ده‌ڤه‌رێن كوردستانی هاتییه‌ دیار کرن.

شێروان دوبەردانی، زێده‌تر دیار كر: دناڤا پرۆژە قانوونا بودجێ گشتی یێ عێراقێ دا دو جۆرێن بودجەیی بۆ پارێزگه‌هان هاتینه‌ دیار کرن، ئه‌و ژی بودجەیێ وەبەرھێنانێ و بودجەیێ پێشڤه‌برنا پارێزگه‌هان، ئەو بودجە ل سەر بنەمایێ رێژا ئاكنجییان بۆ ھەر پارێزگه‌هه‌كێ ل سەر قەزا و ناحیییان هاتینه‌‌ دابەش كرن.

ناڤهاتی ئەو ژی گۆت: ژ بلی وی بودجه‌یی، بودجەكێ تایبەت ژی بۆ ئاڤەدانکرنا شنگالێ و دەشتا نەینەوا هاتییه‌ ته‌رخان كرن، ئانكو دو سندۆق هاتینه‌ دانان بۆ ده‌ڤه‌رێن کوردستانی، سندوقه‌ك بۆ شنگالێ و ئێك ژی بۆ دەشتا نەینەوا و ھەردو سندوق دناڤا پرۆژە قانوونا بودجێ گشتی یێ عێراقێ هاتینه‌ دانان و ل گەل پەسەندکرنا پرۆژە قانوونا بودجەیێ گشتی یێ عیراقێ دێ دەنگ ل سەر وان هه‌ردو سندوقان هێته‌ دان، ئەڤه‌ گاڤه‌كا باشە بۆ ئاڤەدانکرنا ده‌ڤه‌رێن کوردستانی یێن دەرڤه‌یی ئیدارا ھەرێما کوردستانێ.