جێگرێ سه‌رۆكا په‌رله‌مانى راگه‌هاندنه‌ك بۆ دامه‌زراوه‌یێن ده‌ستوورییێن هه‌رێما كوردستانێ و رایا گشتى به‌لاڤكر

د. هێمن هه‌ورامى جێگرێ سه‌رۆكا په‌رله‌مانى راگه‌هاند، به‌رنامه‌یێ روونشتنا قانوونى یا ژماره‌ ( 4 ) رۆژا دووشه‌مبى 22ى گۆلانا 2023ێ كو سه‌رۆكا په‌رله‌مانى ب نه‌قانوونى و نه‌په‌یره‌وى بزاڤێن ب دووماهى ئینانا وێ كرن و روونشتن بجهـ هێلا، جێگرێ سه‌رۆكا په‌رله‌مانى ل ژێر وێ ده‌ستهه‌لاتا برگه‌یا ئێكێ ژ مادده‌یێ ( 19 )یێ په‌یره‌وێ ناڤخۆ ژ پیاده‌كرنا هه‌موو ده‌ستهه‌لاتێن سه‌رۆك په‌رله‌مانى ل ده‌مێ نه‌ئاماده‌بوونێ رێپێداى، سه‌رۆكایه‌تییا روونشتنا ئاماژه‌ پێكرى كر و ب پشتبه‌ستن ب بنه‌مایێن په‌یره‌وان، سه‌رپه‌رشتییا روونشتنێ كر.

راگه‌هاند ژى، ل دووڤ هندێ كو روونشتنێ ده‌ستپێكربوو، نیسابا قانوونى ل به‌رده‌ست بوو، به‌رنامه‌یێ كارى ب تمامى‌ یێ قانوونى بوو، د ده‌ستهه‌لاتا سه‌رۆك په‌رله‌مانیدا نه‌بوو ب نه‌قانوونى و ب پشتبه‌ستن ل برگه‌یا سێیێ ژ مادده‌یێ ( 18 )ێ روونشتنێ گیرۆبكه‌ت، به‌لكو دڤى بیاڤیدا ئه‌گه‌ر پاشخستن و هه‌لاویستن یا پێدڤى با، دڤیابا د ده‌ستهه‌لاتا سه‌رۆكایه‌تییا په‌رله‌مانیدا با و ب ره‌زامه‌ندییا به‌هرا پتر یا په‌رله‌مانى با، لێ به‌هرا پترا ده‌سته‌یا سه‌رۆكایه‌تییێ و به‌هرا پترا په‌رله‌مانى دگه‌ل به‌رده‌وامبوونا روونشتنێ بوون.

جێگرێ سه‌رۆكێ په‌رله‌مانى دووپاتى ل سه‌ر قانوون بوونا روونشتنا ئه‌ڤرۆ كر و راگه‌هاند،

ئێك : هه‌موو ده‌رئه‌نجامێن ئه‌وێ روونشتنێ پشتى به‌رده‌وامبوونێ دێ بهایێن خوه‌ یێن قانوونى و په‌یره‌وێ خۆ هه‌بن.

دوو : ژبه‌ر هندێ كو سه‌رۆكا په‌رله‌مانى هۆلا روونشتنێ و ئاڤاهییێ په‌رله‌مانى ژى بجهـ هێلان، ب ئاماده‌نه‌بوون هاته‌ هژمارتن، له‌وما ل دووڤ برگه‌یا (1) یا مادده‌یێ ( 19 )یێ په‌یره‌وى، هه‌موو ده‌ستهه‌لاتێن ل ده‌ڤ جێگرێ سه‌رۆكێ په‌رمانى دێ هێنه‌ پیاده‌كرن و پێدڤى ب چ ته‌فویزان نینه‌، له‌وما هه‌موو نڤیسار یێن كو ب ئیمزایا جێگرێ سه‌رۆكا په‌رله‌مانى ل دۆر ده‌رئه‌نجامێن روونشتنا ژماره‌ ( 4 ) یا رێككه‌ڤتى 22ى گۆلانا 2023ێ ب هه‌ر دامه‌زراوه‌یه‌كا دهێنه‌ هنارتن، دێ بهایێن قانوونى هه‌بن.