جێگرێ سه‌رۆكێ په‌رله‌مانێ عیراقێ دبێژیت: بزاڤێن ده‌ستكاریكرنێ د مادده‌یێن 13 و 14ێدا ژ پرۆژه قانوونا بودجه‌یدا كو په‌یوه‌ندى ب پشكا هه‌رێما كوردستانێڤه هه‌یه دهێنه‌كرن، ئه‌وژى رێكێ ب ده‌ستكارییان ناده‌ن.
شاخه‌وان عه‌بدولا جێگرێ سه‌رۆكێ په‌رله‌مانێ عیراقێ راگه‌هاند، ئه‌گه‌ر ده‌ستكارى دپشكا هه‌رێما كوردستانێدا بهێته‌كرن، ئه‌و رێكێ ناده‌ن كۆمبوون بهێته‌كرن.
شاخه‌وان عه‌بدولاى ل دۆر ده‌مێ گه‌هشتنا پرۆژه‌قانوونا بودجه‌ی بۆ ده‌سته‌یا سه‌رۆكایه‌تییا په‌رله‌مانى گوت : دانوستاندن هه‌تا نوكه د به‌رده‌وامن و لژنه‌یا دارایى كارێن خوه تمام نه‌كرینه و ژ مادده‌ییێن پرۆژه قانوونا بودجه‌ى، ب تنێ مادده‌یێن 13 و 14 ماینه كو گرێداى پشكا هه‌رێما كوردستانێ نه.
جێگرێ سه‌رۆكێ په‌رله‌مانێ عیراقێ به‌حس ل هندێ كر، بزاڤێن ده‌ستكاریكرنێ د پشكا هه‌رێما كوردستانێدا دهێته‌كرن، لێ ئه‌و رێكێ ب ده‌ستكارییان ناده‌ن، ژبه‌ركو ئه‌ڤه به‌رهه‌مێ دانوستاندنێن دناڤبه‌را دوو حكومه‌تاندایه، دكۆمبوونێدا ئه‌و گه‌له‌ك ب روونى هاتنه ئاگه‌هداركرن كو دبیت هنده‌ك ده‌ستكارى بهێنه‌كرن، لێ ئه‌و مادده‌یه به‌رى كو ببنه مادده‌یه‌كێ دارایى، ره‌هه‌نده‌كێ سیاسى هه‌یه.
ل دووڤ ئاخڤتنێن شاخه‌وان عه‌بدولاى، هنده‌ك ژ په‌رله‌مانتاران كۆمه‌كا پێشنیازان داینه بۆ هندێ ئه‌و دوو مادده‌یه بهێنه هه‌مواركرن، لێ وان پێشنیازان ره‌ت دكه‌ن، دبێژیت ژى: ئه‌گه‌ر رێككه‌ڤتن ل سه‌ر هه‌ردوو مادده‌یێن گریداى هه‌رێما كوردستانێ بهێته‌كرن، ره‌نگه هه‌تا دوو رۆژێن بهێن پرۆسه تمام ببیت.
