<h3 style="text-align: justify;"><span style="font-size: 18pt;">وه‌زیرێ دارایى و ئابوورییێ حكومه‌تا هه‌رێما كوردستانێ راگه‌هاند، حكومه‌تێ پاشكه‌ڤتێ مووچه‌ى كرییه ب قه‌ر و پلان هه‌یه وى قه‌رى بده‌ت و گوت ژى: ئه‌و كه‌سێ ل لژنه‌یا دارایى برگه‌یا پاشكه‌ڤتى زێده‌كرى خوزى هزرا هندێ كربا كو موزایده نه‌كربا و كوژمێ پاره‌ى ژى بۆ دابینكربا.</span></h3> <h3 style="text-align: justify;"><span style="font-size: 18pt;">ئاوات شێخ جه‌ناب نوورى وه‌زیرێ دارایى و ئابوورییێ حكومه‌تا هه‌رێما كوردستانێ د پرێسكۆنفرانسه‌كیدا راگه‌هاند، دووماهى رێكككه‌ڤتنا حكومه‌تا هه‌رێما كوردستانێ دگه‌ل حكومه‌تا فیدرالى ئه‌نجامێ چه‌ندین كۆمبوونێن دى بوو، ئه‌ڤ رێككه‌ڤتنه ژ ئه‌نجامێ رێككه‌ڤتنا لایه‌نێن سیاسییێن هه‌رێما كوردستانێ و عیراقێ بوو كو دروستبوونا هه‌ڤپه‌یمانییا ده‌وله‌تێ ژێ په‌یدابوو.</span></h3> <h3 style="text-align: justify;"><span style="font-size: 18pt;">وه‌زیرێ دارایى گوت : ئه‌و پابه‌ندى رێككه‌ڤتنا دناڤبه‌را هه‌ردوو حكومه‌تاندان و پرۆژه قانوونا بودجه‌ینه، ئه‌و رێككه‌ڤتنه كو ب ئاماده‌بوونا مه‌سرور بارزانى سه‌رۆكێ حكومه‌تا هه‌رێما كوردستانێ و محه‌مه‌د شیاع سوودانى سه‌رۆكوه‌زیرێن عیراقێ هاتییه ئیمزاكرن، هه‌ر ده‌ستكارییه‌كا ژ ده‌رڤه‌ى وێ رێككه‌ڤتنێ د پرۆژه قانوونا بودجه‌یدا هاتبیته كرن به‌رۆڤاژى قانوون و ده‌ستوورى هاتییه كرن، هه‌روه‌سا بریاره‌ك ل دادگه‌ها فیدرالى هه‌یه كو ب بریارا ژماره 35 هاتییه نیاسین، رێگرییێ ل ده‌ستكاریكرنا ئه‌وان مادده‌یێن بودجه‌ی دكه‌ت یێن حكومه‌تێ هنارتینه په‌رله‌مانى، لژنه‌یا دارایى مافێ هندێ هه‌یه ده‌ستكارییێ د ژماره‌یاندا بكه‌ت، لێ مافێ زێده‌كرن یان ژێبرنا نڤیسارا وان نینه.</span></h3> <h3 style="text-align: justify;"><span style="font-size: 18pt;">دووپاتى ل هندێ ژى كر، ده‌ستكاریكرن د مادده‌یاندا نه‌ده‌ستوورى و نه‌قانوونییه، ئه‌و وه‌سا دبینن هنده‌ك خه‌فك بۆ ریككه‌ڤتنا دناڤبه‌را هه‌ردوو لایاندا هاتینه دانان، ئه‌ڤه‌ژى بۆ تێكدانا په‌یوه‌ندییێن هه‌ولێر و به‌غدایه.</span></h3> <h3 style="text-align: justify;"><span style="font-size: 18pt;">ئاوات جه‌نا نوورى دیاركر، ب تایبه‌تى د مادده‌یێن 13 و 14ێدا گه‌له‌ك ده‌ستكارى د پرۆژه قانوونا بودجه‌یدا هاتییه كرن، گوهۆرینه‌ك دبرگه‌یا دووێدا كرییه، كو به‌رۆڤاژى ریككه‌ڤتنا دناڤبه‌را هه‌ردوو لایاندایه، دوێ برگه‌یێدا ئه‌و مافه ژ هه‌رێمێ ستاندییه كو ل دووڤ مادده‌یێن 111 و 112ێ ده‌ستوورێ عیراقێ بۆ گه‌لى یێ پاراستییه، دوێ گوهۆرینێدا مافێ هه‌رێما كوردستانێ هاتییه پێشێلكرن، هه‌روه‌سا د برگه‌یه‌كا دیدا زێده‌كرییه كو ئه‌گه‌ر برگه‌یێن ئێكێ و دووێ نه‌هێنه بجهئینان، ئێكسه‌ر بودجه‌یا هه‌رێما كوردستانێ بهێته راگرتن، كو ئه‌ڤه پێشنیازه‌كا گه‌له‌كا شاشه، ژبه‌ركو دهه‌ر ئه‌گه‌ره‌كیدا وه‌لاتى و فه‌رمانبه‌ر دێ د زه‌ره‌ر مه‌ندبن.</span></h3> <h3 style="text-align: justify;"><span style="font-size: 18pt;">به‌حس ل هندی ژى كر، ئه‌و وه‌كو حكومه‌تا هه‌رێما كوردستانێ ب وى مه‌رجى رازیبوون بودجه بهێته كێمكرن كو ل هه‌یڤا ئوكتۆبه‌را ئه‌ڤساله سه‌رژمێریارییا گشتى بهێته‌كرن، ل وى ده‌مى ل دووڤ وێ سه‌رژمێریارییێ پشكا بودجه بهێته دیاركرن.</span></h3> <h3 style="text-align: justify;"><span style="font-size: 18pt;">وه‌زیرێ دارایى ئاماژه ب هندێ ژى دا، هنده‌ك ژ وان گوهۆرینێن د مادده‌یێن 13 و 14ێدا هاتینه كرن ژبه‌ر نه‌بوونا زانیارییان هاتینه كرن، ئه‌وێن گوهۆرین كرین ژبلى ئاریشه و سه‌رئێشانێ چ تشتێ دى نه‌كرییه.</span></h3> <h3 style="text-align: justify;"><span style="font-size: 18pt;">سه‌باره‌ت پاشكه‌ڤتنێ مووچه‌ى وه‌زیرێ دارایى گوت: پاشكه‌ڤتنێ مووچه‌ى چوویه ناڤ موزایه‌ده‌كا سیاسى، هه‌ر كه‌سه‌كێ ئه‌و برگه د پرۆژه قانوونا بودجه‌یدا زێده‌كربیت، خوزى هزرا هندێ ژى كربا كو موزایه‌ده‌یه و كوژمێ پاره‌ى ژى بۆ ته‌رخانكربا، هه‌ر كه‌سێ بزاڤێ بكه‌ت پاشكه‌ڤتێ مووچه‌ى بگریت ئه‌و بخۆ دێ ده‌ستى وى ماچى كه‌ت، حكومه‌تا هه‌رێمێ پێنگاڤ بۆ دانا پاشكه‌ڤتنێ مووچه‌ى هاڤێتینه، ئێكه‌م پێنگاڤ ژى ئه‌وبوو كو ل سه‌ر حكومه‌تێ كرییه قه‌ر، ژبه‌ركو پلان هه‌یه وى قه‌رى بده‌ت، ئه‌وێ ژ 2013ێ وه‌ره مووچه‌یێ فه‌رمانبه‌رێن هه‌رێما كوردستانێ نه‌هنارتى حكومه‌تا عیراقێ بوو و ئه‌ركێ هه‌ردوو لایانه ئه‌وى قه‌رێ فه‌رمانبه‌ران بده‌ت.</span></h3>
