مەسعود حەیدەر: ئەگەر پەسەندکرنا بودجێ گیرو ببیت پێدڤیە جڤاتا وەزیرێن عیراقێ بڕیارێ ل سەر هنارتنا 400 ملیار دینارێن دی بۆ هەرێمێ بدەت

بریكارێ وه‌زاره‌تا دارایی یا عیراقێ رایگەهاند، ئیداره‌یا ده‌وله‌تێ یا پێگیرە ب ڕێککەڤتنا دناڤبەرا هەولێر و بەغدا دا، گۆتیە ژی،”ئەگەر پەسەندکرنا بودجێ گیرو ببیت، پێدڤیە جڤاتا وەزیرێن عیراقێ بڕیارێ بۆ هنارتنا 400 ملیارێن دی بۆ مووچەیێ هەیڤەکا دی یا فەرمانبەرێن هەرێمێ دەربێخیت.”

مه‌سعوود حه‌یده‌ر، بریكارێ وه‌زاره‌تا دارایی یا عیراقێ ڕاگەهاند،ب مخابنیڤە هندەک کەسێن سیاسی یێن ل عیراقێ هەین، کو چ تشتەک ڤێ نینە خۆ پێ دیار بکەن، بتنێ کارکرن لسەر دۆسەیا هەرێما کوردستانێ نەبیت.

دیارکر ژی،”ئیدارەیا دەولەتێ، پێگیرن ب ڕێککەڤتنا دناڤبەرا هەولێر و بەغدا دا، سەرۆکوەزیرێن عیراقێ ژی ڕۆلەکێ کاریگەر د ئەڤی دەربارەیدا هەیە.”

دەربارەی هنارتنا نەفتا هەرێما کوردستانێ، مه‌سعود حه‌یده‌ر گۆت:”ره‌هه‌ندێ دەڤەرێ و نێڤدەولەتی یێ هەی، پێدڤیە رێككه‌ڤتن دگەل توركیا بهێتە کرن”.

دەربارەی‌ په‌سه‌ندكرنا بودجه‌یا عیراقێ ئاماژه‌‌ كر، پێدڤیە ب ڕێککەڤتن بودجە بهێتە دەربازکرن، ئەو ئەگەر ڕێککەڤتن نەهێتە کرن دێ ڤەگەڕینە خالا سفرێ کو د بەرژەوەندییا پێکهاتەیێن عیراقێدا نینە.

گۆتژی: “بزاڤێن سه‌رۆكوه‌زیرێن هەرێما کوردستانێ مه‌سرور بارزانی و كوردێن دناڤ حكومه‌تێ و په‌رله‌مانیدا، ب ‌وی ئاراسته‌یه‌‌نە کو چاره‌سه‌رییا  پرسان بهێتە کرن”.

دەربارەی هنارتنا 400 ملیار دینارێن دی ‌، بریكارێ وه‌زاره‌تا دارایی و ئابووری عیراقێ گۆت: “چاڤەڕێین بودجه بهێتە پەسەندکرن و شایستەیێن‌ دارایی یێن دناڤ بودجێدا بهێنە ڕەوانەکرن، ئه‌گه‌ر په‌سه‌ندكرنا بودجێ گیرو ببیت، پێدڤیە جڤاتا وەزیرێن عیراقێ بڕیارێ بۆ هنارتنا 400 ملیارێن دی بۆ مووچەیێ هەیڤەکا دی یێ فەرمانبەرێن هەرێما کوردستانێ دەربێخیت.”