سه‌رۆكوه‌زیرێن بریتانیا بۆ كۆچبه‌ران : ئه‌گه‌ر هوون بشێن بهێنه‌ بریتانیا ژى، نه‌شێن بمینن

ریشى سووناك سه‌رۆكوه‌زیرێن بریتانیا دبێژیت: ل دووڤ قانوونا نوو یا به‌رهنگاربوونا كۆچا نه‌قانوونى، ئه‌گه‌ر كوچبه‌ر بشێن بهێنه‌ بریتانیا ژى، نه‌شێن بمینن و گوت : هه‌ر كوچبه‌ره‌ك ب نه‌قانوونى بچیته‌ وه‌لاتێ وان، ئێكسه‌ر دێ هێته‌ ده‌سته‌سه‌ركرن و ره‌وانه‌ رواندا یان وه‌لاتێ سێیێ هێته‌كرن.

ریشى سووناكى ل ده‌مێ سه‌ره‌دانا خوه‌ بۆ به‌نده‌رێ دۆڤه‌ر راگه‌هاند، دوو كه‌شتییێن دى یێن تایبه‌ت ب كۆچبه‌ران هاتینه‌ دروستكرن، داكو ئه‌وان په‌ناخوازان تێدا ب حه‌وینن یێن چووینه‌ بریتانیا.

ئاماژه‌ ب هندێ ژى دا، ئه‌و كه‌شتییه‌ هه‌تا دووماهییا ئه‌ڤ ساله‌ دێ نێزیكى سێ هزار په‌ناخوازان حه‌وینن و ئه‌ڤ چه‌نده‌ دێ بارگرانییا  ل سه‌ر هۆتێلان سڤك كه‌ت.

ل دووڤ ئاخڤتنێن سووناكى‌، ئێكه‌م كه‌شتییا ژ وى جۆرى ل حه‌فتییا بهێت دێ گه‌هیته‌ ئاڤا پۆرتلاند ل باشوورێ ئینگلته‌را و هزار كۆچبه‌ران حه‌وینیت.