<h3 style="text-align: justify;"><span style="font-size: 18pt;">دپرۆژه قانوونا بودجه‌یا گشتییا عیراقێدا 100 ملیار دینار بۆ قه‌ره‌بووكرنا زیانڤێكه‌ڤتییێن تیرۆرێ هاتینه ته‌رخانكرن، كو تێرا 10%ێ یا قوربانییان دكه‌ت، جێگرێ دووێ یێ سه‌رۆكێ لژنه‌یا ئاسایش و به‌رگرییێ ل په‌رله‌مانێ عیراقێ دبێژیت: ره‌نگه گوهۆرین د وى كوژمه‌یێ هاتییه ته‌رخانكرندا بهێته‌كرن.</span></h3> <h3 style="text-align: justify;"><span style="font-size: 18pt;">سه‌گڤان سندى جێگرێ دووێ یێ سه‌رۆكێ لژنه‌یا ئاسایش و به‌رگرییێ ل په‌رله‌مانێ عیراقێ بۆ ئاژانسا خانى دیاركر، د پرۆژه‌قانوونا بودجه‌یا گشتییا عیراقێدا 100 ملیار دینار بۆ قه‌ره‌بووكرنا قوربانییێن ده‌ستێ تیرۆرێ هاتینه ته‌رخانكرن، د ده‌مه‌كیدا 110 هزار قوربانییێن تیرۆرێ ل عیراقێ هاتینه تۆماركرن، 10 ملیۆن دینار دێ ب كه‌سوكارێن وان هێنه‌دان.</span></h3> <h3 style="text-align: justify;"><span style="font-size: 18pt;">ل دووڤ ژمارا قوربانییێن تیۆرۆرێ ل عیراقێ ئه‌و پاره‌یێ دبودجه‌یا ئه‌ڤ ساله‌دا هاتییه ته‌رخانكرن، ب تنێ تێرا 10%ێ یا قوربانییێن تیرۆرێ دكه‌ت.</span></h3> <h3 style="text-align: justify;"><span style="font-size: 18pt;">سه‌گڤان سندى گوت ژى : هاتییه پێشنیازكرن پاره‌یی قه‌ره‌بووكرنێ ببیته پێنج ملیۆن دینار داكو پترین زیانڤێكه‌ڤییێن تیرۆرێ مفاى ژێ وه‌ربگرن، یان ئه‌و پاره ب رێزبه‌ندییێ بهێته‌دان، ل ده‌ستپێكێ ئه‌و خێزانه بهێنه قه‌ره‌بووكرن یێن كو سێ كه‌س ژ ده‌ستداین، دووڤدا قه‌ره‌بوویا وان بهێته‌كرن یێن دوو كه‌س ژ ده‌ستداین.</span></h3> <h3 style="text-align: justify;"><span style="font-size: 18pt;">هه‌روه‌سا دیاركر، ئه‌و چاڤه‌رێنه بودجه بهێته په‌سه‌ندكرن داكو بریارا دووماهییێ ل سه‌ر شێوازێ قه‌ره‌بووكرنا قوربانییان بهێته دان و دبیت گوهۆرین د كوژمه‌یێ دیاركریدا هێته‌كرن.</span></h3>
