عەلی عەونی: ئەم وەکو پارتی داخوازا زڤراندنا 100% ێ یا مووچەیێ فه‌رمانبه‌رێن کوردستانێ دکەین

  ئاژانسا خانی:

عه‌لی عه‌ونی” ئەندامێ كۆمیتا ناڤه‌ندی یا پارتی دیموكراتی كوردستان و به‌رپرسێ لقا ئێك یا پارتی بۆ ئاژانسا خانی گۆت: ئه‌م وه‌كو پارتی داخوازا زڤراندنا 100% ێ یا مووچەیێ كارمه‌ندێن كوردستان دكەین و پێدڤییە حکومەتا عێراقێ و حزبێن موزایەدچی یێن کوردستانێ ب تنێ بۆ مزایەداتان و شەڕێ هەلبژاتنان خالێن بێ ناڤەڕۆک نەئێخنە دناڤ یاسایا بودجەیێ عێراقێدا” پێدڤییە ل گەل نڤێسینێ، پارەیی ژی بۆ تەرخان بکەن و دانانا خالا 10% ێ بێی دانا پارەیی ب تنێ بۆ هاندانا خەلکێیە ل دژی حکومەتا کوردستانێ.

ناڤهاتی زێده‌تر دبێژیت: حکومەتا عێراقێ ژ سالا ٢٠١٤ ێ هه‌تا نوكه‌ ئابلۆقە دانایە سەر هەرێما کوردستانێ و بوویە ئەگەر کو حکومەت ب نەچاری مووچەیی پاشەکەفت بکەت” دڤێت دۆر ژ موزایەدە و شەڕێ دەنگ کۆمکرنێ بۆ هەلبژارتنێن بهێن یێن په‌رله‌مانێ كوردستانی، حکومەتا بەغدا پارێ مووچەیێ خەلکێ ب تەمامی بهنێریت و شەرمەکا مەزنە کو نوونەرێن حزبێن دی ل سەر شاشێن تەلەفزیۆنان درەوان دکەن ل دژی پارتی و حکومەتا هه‌رێما کوردستانێ” هه‌روه‌سا ئەو درەوان بۆ بەرژەوەندییا عێراقێ دکەن .

ئه‌و چه‌ند ژی گۆت: بۆچی ئه‌و داخوازا 10% ێ دکەن و بۆچی داخوازا 100% ێ یا مووچەیی ناکەن و داخواز ناکەن بەغدا پارەیی ژی زێدە بکەته‌ سەر پشکا میزانییا هەرێما کوردستانێ ؟.