ئهڤرۆ شهمبییێ 10ی خزیرانا 2023 ێ” ل ههولێرێ ب پشكدارییا سهرۆك بارزانی كۆنگرێ 12 ێ یێ پارتی دیموکراتی کوردستان – سووریا دهستپێكرد و تێدا سهرۆك بارزانی گۆتارهك پێشكێش كر.
سهرۆك بارزانی د گۆتارا خۆ دا ب خێرهاتنا مێهڤانان بۆ باژێرێ ههولێر كر و هیڤییا سهركهفتنێ بۆ خواستن و راگههاند، هیڤیدارم كۆنگرێ ههوه یێ سهركهفتی بیت و د ئاستێ داخوازییا جهماوەرێ ههوه دا بیت. ههروهسا رۆلێ پارتی دیموکراتی کوردستان – سووریا د شۆرهشێن ئیلۆنێ و گوڵانێ دا بلند نرخاند و پێزانین بۆ بزاڤ و خهباتا لهشكهرێ رۆژ د شهرێ دژی تیرۆرستێن داعش دا ههبوون كو ب دههان شههید پێشكێشی نیشتیمانی كرینه.
سهرۆك بارزانی گۆت ژی، سوپاسییا ههوه و ههموو ئهوان خهباتكهران دكهم كو ل دهمێ بوری و نوكه دا رۆلێن گرنگ دیتین د بزاڤا ئازادیخوازییا گهلێ مه دا و ل ڤێرێ سلاڤان بۆ جهماوهرێ خۆڕاگرێ ههوه دهنێرم و سلاڤ بۆ ئهوێن كو ئاوارهیی وهڵاتان بووین و ئهوێن ل ڤێرێ ل مالا خۆ ژی.
سهرۆك بارزانی هیڤی خواست رهوشهك دروست بیت” كو بشێن ڤهگهرنهڤه جهێ باب و باپیران و ب ئێكگرتی رووبروو تهحهدییاتان ببن، ههروهسا داخواز كر دۆستایهتی و ههڤپهیمانییا خۆ پتر ب هێز بكهن و گۆت ژی، ل دهستپێكا روودانێن سووریا ل سالا 2011 ێ ب بهردهوامی پشتهڤانێن ههوه بووین بۆ هندێ ئێكرێز و تهڤا و ئێكڕهنگ بن و ههر بڕیارهكا بۆ ههوه باش بیت بدهن.
ئهو ژی گۆت، ئهم پشتهڤانێن ههوه بووین بۆ هندێ ههموو لایهن سێ كۆنگران (دو ل ههولێرێ و ئێك ل دهۆكێ) ببهستن بۆ خهبات و پێكڤهیا نهتهوهیی، بهلێ مخابنی بهربهست هاتنه دروستكرن، بێگومان رێیا خهباتا گهلی یا دوور و درێژە و ئهوێن دبنه بهربهست ل ههمبهر دهستكهفتان، دێ باجا وێ چهندێ دهن.
سهرۆك بارزانی ل دووماهییا گۆتارا خۆ دا تهكهز كر، ئهم ههردهم پشتهڤانێن ههوهینه ژ پێخهمهتی خهباتهكا راستهقینه یا نهتهوهیی و نیشتمانی كو خزمهتا دۆزا رهوایا گهلێ كورد بكهت ل سووریا.
سهرۆك بارزانی سلاڤ بۆ گیانێ پاقژێ ئهوان تێكۆشهران هنارت یێن كو ب نهحهقی هاتینه شههید كرن و ئهوێن د زیندانانڤه.
كۆنگرێ 12 ێ یێ پارتی دیموكراتی كوردستان – سووریا ب ئهمادهبوونا پتر ژ 220 ئهندامان ل ههولێرێ بۆ دهمێ دو رۆژان دێ هێته گێران و تێدا 29 ئەندامێن کۆمیتا ناڤین دێ هێنه هەلبژارتن و پاشی سكرتێرێ پارتی دیموكراتی كوردستان – سووریا دێ هێته ههلبژارتن.
