<h3 style="text-align: justify;"><span style="font-size: 18pt;">رێڤهبهرێ رێڤهبهرییا كار ل دهۆكێ راگههاند، د ئهڤ سالهدا زێدهتر ژ 280 كهسان داخوازا دهلیڤێن كاركرنێ ژ رێڤهبهرییا وان كرییه، ل دووڤ قانوونێ نابیت كهسێن دبن 18 سالییێدا ل كافییان كار بكهن.</span></h3> <h3 style="text-align: justify;"><span style="font-size: 18pt;">عهبدولكهریم شێخ حهماد رێڤهبهرێ رێڤهبهرییا كار ل دهۆكێ بۆ ئاژانسا خانى دیاركر، ئهوان لژنهیهكا ههڤپشك ههیه كو ئهندامهكێ رێڤهبهرییا وان و ڤهكۆلهرێن جڤاكى و پولیسێن سنیلان و ئهندامێن رێكخراوا زارۆك پارێزان د وێ لژنێدا كار دكهن و سهرهدانا جهێن كاران دكهن، ل دووڤ قانوونێ سنێلێن ژییێ وان دناڤبهرا 15 بۆ 17 سالییێدا مافێ كاركرنێ ههیه، لێ نابیت كارێن گران بكهن ههروهسا نابیت ل دهمێ ب شهڤێ و ل كافییان كاربكهن.</span></h3> <h3 style="text-align: justify;"><span style="font-size: 18pt;">سهبارهت وان زارۆكێن ل سهر جاددهیان كار دكهن گوت : ئهو زارۆكێن ل جاددهیان كاردكهن بههرا پتر یا وان ب مهرهمێن خازۆكییێ كاردكهن، ئهڤ بابهته گرێداى ڤهكۆلهرێن جڤاكی و پۆلیسێن سنێلایه، گهلهك جاران ڤهكۆله و لژنهیێن وان چووینه مالێن وان زارۆكان، لێكۆلین كرینه كا بۆچى زارۆكێ وان ل سهر جاددهیان كار دكهت، وهكو پێدڤى سهرهدهرى دگهلدا هاتییه كرن و گهلهك ژ وان مالان هاریكارى ژلایێ رێكخراوێڤه وهرگرتینه، مهرهما وان ژ ڤێ چهندێ ئهوه كو ئهو زارۆكه ژ جاددهیان ڤهبن و ڤهگهرنه ناڤهندێن خاندنێ، ل پار سال 250 سنێلین ژ 15 ههتا 17 سالییێ كاردكرن، رێژهیهكا ژ وێ ژمارێ ، دگهل خێزانێن خوه وهكو دهیك، باب و برایان كاردكر و ئهڤ چهنده د قانوونێدا یا رێ پێدایه، لێ دگهل هندێ ژى ئهو كارێ دكهن، دڤێت یێ سڤك بیت و سنێله گهلهك زهحمهتێ نهبینن.</span></h3> <h3 style="text-align: justify;"><span style="font-size: 18pt;">رێڤهبهرێ رێڤهبهرییا كار ل دهۆكێ ل دۆر كهسێن دسهر 18 سالییێدا دیاركر، د ئهڤ سالهدا 287 كهسان بۆ بدهستخستنا دهرفهتێن كاركرنێ ناڤێن خوه ل دهڤ وان تۆماركرینه، لژنهیێن وان سهرهدانا 128 جهێن كاركرنێ كرینه، 578 كهسان ب رێكا تلهفۆنێ داخوازا بدهستخستنا دهرفهتێن كارى كرینه، رێڤهبهرییا وان 37 كهس هنارتینه سهر كاران، 26 كهسان دهرفهتێن كاركرنێ بۆ هاتینه دیتن، لێ وان رهتكرینه كار بكهن، 13 كهسان وان بخۆ كار بۆ خوه دیتییه، راهێنانێن كاركرنێ ژى ب 255 كهسان هاتینه كرن.</span></h3> <h3 style="text-align: justify;"><span style="font-size: 18pt;">ئاماژه ب هندێ دا، لژنهیێن وان ل دهمێ سهرهدانا جهێن كاركرنێ دكهن، ئهگهر وى جهى پێگیرى ب قانوونا كاركرنێ نهكربیت، ل دهستپێكێ دێ هوشدارییهكێ دهنێ، دێ ههتا 15 رۆژان دهرفهتێ دهتێ كو وان كێم و كورییان چارهسهر بكهت، دووڤدا ئهگهر ههر پێگیرى نهكربیت، دێ هوشدارییهكا فهرمى بۆ ماوێ 15 رۆژێن دى دهنێ، ئهگهر ههر پێگیرى پێ نهكر، دێ هوشدارییا دووماهییێ بۆ ماوێ 10 رۆژان دهنێ، دووڤدا دێ بۆ دادگههێ هێته رهوانهكرن، لێ ههتا نوكه چ جهـ نهگههشتینه وى رادهیى كو رهوانه دادگههێ بهێنهكرن.</span></h3>
