دێ ده‌ست ب چاككرنا رێكا مووسل بۆ به‌رده‌ره‌ش هێته‌كرن

بریاره‌ دڤان دوو رۆژاندا ده‌ست ب چاككرنا رێكا دناڤبه‌را باژێرێ مووسل و قه‌زایا به‌رده‌ره‌شدا بهێته‌كرن و پتر ژ دوو ملیار دیناران بۆ چاككرنا ڤێ رێكی هاتینه‌ ته‌رخانكرن.

شێروان دوبه‌ردانى نوونه‌رێ پارێزگه‌ها نه‌ینه‌وا و ئه‌ندامێ فراكسیۆنا پارتى دیموكراتى كوردستان ل جڤاتا نوونه‌رێن عیراقێ بۆ ئاژانسا خانى دیاركر، رێكارێن چاككرنا رێكا ( مووسل – به‌رده‌ره‌ش) تمامبووینه‌ و دڤان دوو رۆژاندا دێ ده‌ست ب جهئینانا پرۆژه‌ى هێته‌كرن.

ئاماژه‌ ب هندێ ژى دا، رێكا دناڤبه‌را مووسل و به‌رده‌ره‌شێدا ژ ته‌حریرێ بۆ مه‌ندانێ پێدڤى ب چاككرنێ یه‌ كو دریژاهییا وێ 22.5 كیلۆمه‌تره‌ و دبیت ژ حه‌فت هه‌تا 10 كیلۆمه‌ترێن دى ژى ل سه‌ر ڤێ رێكێ بهینه‌ درێژكرن، دوو ملیار و 513 ملیۆن و 140 هزار دینار بۆ هاتینه‌ ته‌رخانكرن و چاڤه‌رێیه‌ پرۆژه‌ دماوێ سێ هه‌یڤاندا بهێته‌ بجهئینان.

شێروان دوبه‌ردانى ئاشكراكر، ئه‌ڤ پرۆژه‌ دێ ل سه‌ر بودجه‌یا پارێزگه‌ها نه‌ینه‌وا هیته‌ بجهئینان و ئه‌و پارێزگه‌هه‌ ب خۆ دێ سه‌رپه‌رشتییێ  ژى كه‌ت، هه‌روه‌سا وان هه‌ماهه‌نگى دگه‌ل رێڤه‌به‌رییا رێك و پران ل ئاكرێ هه‌یه‌.