سكرتێرێ یانهیا دهۆك راگههاند، ههتا نوكه چ بهیاننامهیێن فهرمى ل دۆر خۆلا پیشهكارێن عیراقێ نهگههشتینه وان، ئهو نووچهێن بهلاڤبووین كو ئێكهتییا عیراقێ دێ كوژمهكێ پارهى دهته وان یانهیان یێن پشكدارییێ دخۆلا پیشهكارێن عیراقێدا دكهن، ب تنێ ژلایێ هندهك كهس و پهیجانڤه بهلاڤبووینه و چ بهیاننامهیێن فهرمى ل دۆر ڤى بابهتى نهگههشتینه وان.
جاسم حاجى سكرتێرێ یانهیا دهۆكێ بۆ ئاژانسا خانى دیاركر، ههتا نوكه نه ئێكهتییا عیراقێ و نه چ لایهنین دى یێن پهیوهندیدار، ب فهرمى بهیاننامه ل دۆر پیشكێشكرنا كوژمهكێ پارهى بۆ وان یانهیێن دێ ل وهرزێ بهێت پشكدارییێ د خۆلا پیشهكاراندا كهن نهگههاندینه وان، ئهوا بهلاڤبووى كو ئێكهتییا عیراقی دێ كوژمهكێ پارهى ژ دوو ملیار دیناران ههتا چار ملیاران بۆ یانهیا خهرجكهت، ب تنێ هندهك ئاخڤتنن و ژلایێ هندهك كهس و پهیجانڤه هاتینه بهلاڤكرن، ههتا نوكه چ بهیاننامهیێن فهرمى سهبارهت ڤى بابهتى نهگههشتینه وان و ئهو پشتبهستنێ ل سهر پهیجان ناكهن.
ژلایهكێ دیڤه جاسم حاجى ل دۆر ئاستێ یانهیا دهۆك ل ڤى وهرزى دیاركر، ئهو ژ ئاستێ تیمێ درازینه، ل دهستپێكێ ئارمانجا وان ب تنێ ئهوبوو دخۆلا نایابدا ب مینین، لێ تیم ب ئاستهكێ باشتر دهركهڤت و ژێ درازینه.
ههروهسا گوت : پشتى ئهڤ سێ یارییێن ماین ب دووماهى دهێن، كارگێرییا یانهیێ دێ دهست ب كۆمبوونێن خوه كهت و پلانا خوه بۆ وهرزێ بهێت دانیت، ههر بریارهكا دبهرژهوهندییا یانهیێدا بیت دێ هێته دهركرن و كار پێ هێتهكرن، ئارمانجا وان ئهوه یانهیێ پتر پێشبێخن و ئاستێ تیمێ بهێزتر لێ بكهن.
