هەوار محەمەد، بەرپرسێ پشکا یاسایی یا دەزگەهێ هەلبژارتنێن پارتی دیموکراتی کوردستان بۆ ئاژانسا خانی ڕاگەهاند، پێشنیار هاتیە کرن هەلبژارتنێن پەرلەمانێ کوردستانێ و جڤاتێن پارێزگەهێن هەرێما کوردستانێ د ئێک دەم دا بهێنە ئەنجامدان، گۆتژی:”ئەو پێشنیارە ژ لایێ سەرۆکێ جڤاتا پارێزگەها هەولێرێ ڤە بۆ وەزارەتا ناڤخۆ هاتیە ئاراستەکرن و وەزارەتا ناڤخۆ ژی پەسەند کریە.”
بەرپرسێ پشکا یاسایی یا دەزگەهێ هەلبژارتنێن پارتی دیموکراتی کوردستان دیارکر، پێدڤیە لایەنێن سیاسی د ئاستێ بەرپرسیارەتییێ دابن بۆ ئەنجامدانا هەلبژارتنێن پەرلەمانی و ئاماژە کر، دبیت ب ڕێکا دەستەیەکا دادوەری هەلبژارتنێن پەرلەمانێ کوردستانێ بڕێڤە بچن.
هەوار محه‌مە‌د گۆت، سەرۆکێ هەرێما کوردستانێ و سەرۆکێ حکومەتا هەرێما کوردستانێ، بزاڤان دکەن کو دەمەکی بۆ ئەنجامدانا هەلبژارتنێن پەرلەمانێ هەرێما کوردستانێ دیار بکەن و دگەل بەغدا بەردەوام لسەر خەتن بۆ دیتنا ڕییەکا چارەسەرییێ بۆ ئەنجامدانا هەلبژارتنێن پەرلەمانێ هەرێما کوردستانێ.
دیارکر ژی:”پێدڤیە ئەڤ کارێ گرنک ب رێکا سازییێن یاسایی و دەستووری یێن هەرێما کوردستانێ بهێتە ئەنجامدان، کو ئەو ژی کومسیۆنا هەلبژارتنێن هەرێما کوردستانێ یە، لێ دبیت ب میکانزمەکا نوو بهێتە ئەنجامدان، ئەو میکانزمە ژی ئەوە کو ل گۆرەی وان دەستهەلاتێن سەرۆکێ هەرێما کوردستانێ هەین، د شیان دایە دەستەیەکا دادوەران وەکی یا کۆمسیۆنا بلند یا هەلبژارتنێن عیراقێ بۆ بڕێڤەبرنا هەلبژارتنێن پەرلەمانێ کوردستانێ بهێتە دەستنیشانکرن.
بەرپرسێ پشکا یاسایی یا دەزگەهێ هەلبژارتنێن پارتی دیموکراتی کوردستان ئاماژە کر، پێدڤیە لایەنێن سیاسی یێن کوردستانێ بۆ ئەنجامدانا هەلبژارتنێن پەرلەمانێ کوردستانێ ئامادە بن.
دەربارەی هەلبژارتنێن جڤاتێن پارێزگەهان هەوار محەمەد گۆت:”مە دڤێت زۆرترین دەنگێن کوردان کۆم بکەین، ژ بۆ کو کورد بشێن زۆرترین ڕێژەیا کورسیان ب دەستڤە بینن و ڕۆلێ کوردان ب ڕەنگەکی بیت کو ژ هەژی پێگەهێ کوردان بیت.”
هەروەسا دیارکر، هەلبژارتنێن جڤاتێن پارێزگەهان وەکی هەلبژارتنێن پەرلەمانی د گرنگن، ژ روویێ دارایی ڤە ژی گەلەک گرنگە هەردوو هەلبژارتن پێکڤە بهێنە ئەنجامدان.
