كۆمبوونا پارتى و ئێكه‌تییێ ب دووماهى هات

كۆمبوونا پارتى و ئێكه‌تییێ ل پیرمام ب دووماهى هات، و چاڤدێره‌كێ سیاسى دبێژیت : كۆمبوونا مه‌كته‌بێن سیاسییێن پارتى و ئێكه‌تییێ دڤى ده‌میدا گه‌له‌ك یا گرنگه‌.

ئه‌ڤرۆ شانده‌كێ مه‌كته‌با سیاسییا پارتى دیموكراتى كوردستان كو ژ فازل میرانى، سیداد بارزانى، هشیار زێبارى، مه‌حموود محه‌مه‌د و زاگرۆس فه‌تاحى پێكهاتبوو، دگه‌ل شانده‌كێ ئێكه‌تییێ ب سه‌رۆكایه‌تییا بافل تاله‌بانى، درباز كۆسره‌ت ره‌سۆل، جه‌عفه‌ر شێخ مسته‌فا و شالاو عه‌لى عه‌سكه‌رى كۆمبوو.

چاڤدێره‌كێ سیاسى بۆ ئاژانسا خانى دیاركر، ئه‌ڤ كۆمبوونا پارتى و ئێكه‌تییێ ئێك ژ وان كۆمبوونایه‌، یێن پشتى گازییا سه‌رۆك بارزانى بۆ پارتێن سیاسیێن كوردستانی بۆ رێكخستنا ناڤ مالا كوردى هاتییه‌، و گرنگییه‌گا مه‌زن بۆ ره‌وشا نوكه‌ هه‌رێم تێدا دبووریت هه‌یه‌.

ئاماژه‌ ب هندێ ژى دا، كۆمبوونا مه‌كته‌بێن سیاسییێن پارتى و ئێكه‌تییێ دڤى ده‌میدا گرنگییه‌ مه‌زن بۆ خوه‌ ئاماده‌كرن و  پشكداریكرنێ دهه‌لبژارتنێن جڤاتێن پارێزگه‌هێن عیراقێدا تایبه‌ت ل كه‌ركووك و مووسلێ هه‌یه‌، هه‌روه‌سا بۆ ڤه‌گه‌راندنا باوه‌رییێ دناڤبه‌را پارتى و ئێكه‌تییێدا و دناڤبه‌را وان و خه‌لكی ژى دا و رێكخستنا ره‌وشا داراییا هه‌رێما كوردستانێ پشتى په‌سه‌ندكرنا بودجه‌یا گشتییا عیراقێ یا گرنگه‌.