سه‌گڤان سندی: عێراقێ پرانییا پاسەوانێن سنووری بۆ خۆ دامەزراندن

ئاژانسا خانی:

جێگرێ سەرۆکێ لژنا ئاسایش و بەرگرییێ ل پەرلەمانێ عێراقێ دیار كر: وه‌سا بریاربوو دو هزار و 600 پاسەوانێن سنووری ژ خەلكێ هەرێما کوردستانێ بۆ هەرێمێ بهێنه‌ دامەزراندن، بەلێ عیراقێ پرانییا وان ناڤان بۆ خۆ دامەزراندینە و ب تنێ 900 کەس ژ خەلكێ هەرێما کوردستانێ هاتینه‌ دامەزراندن و عیراقێ غه‌در ل هه‌رێمێ كرییه” ژبه‌ركو سنوورێن عیراقێ پێدڤی ب پاسه‌وانان نینە، هەرێما کوردستانێ پتر پێدڤی پێ هه‌یه‌.

سەگڤان سندی، زێده‌تر بۆ ئاژانسا خانی گۆت: عیراقێ بریار دابوو دو هزار و 600 پاسەوانێن سنووری بۆ هەرێما کوردستانێ دابمەزرینیت، لدووڤدا عیراق پەشیمان بوویه‌ و گۆتییه‌ پێدڤییە پشكه‌كا وان پاسه‌وانان بۆ عێراقێ بن، ده‌مێ ناڤ هاتینه‌ راگه‌هاندن عیراقێ هزار و 700 کەس بۆ خۆ دامەزراندینە و پشکا هەرێما کوردستانێ ژی کرییە 900 کەس،  ئەڤه‌ غەدره‌كە ل هەرێما کوردستانێ هاتییه‌ کرن.

ناڤهاتی گۆت ژی، هه‌كه‌ هات و عیراقێ پێدڤی ب وان پاسه‌وانان نه‌بیت” دێ نه‌چار بن بۆ هەرێما کوردستانێ رەوانە بکەن، هه‌ر چه‌نده‌ ناڤێن وان پاسه‌وانان هاتینه‌ و دێ ده‌ست ب كار بن” هەموو رێکار تەمام بووینە، د هه‌مان ده‌مدا پێدڤی بوو هه‌موو ئەو پاسەوانه‌ خەلكێ هەرێما کوردستانێ بانه‌، بەلێ حكومه‌تا عیراقێ پەشیمان بوویە و پرانییا وان پاسه‌وانان بۆ خۆ دامەزراندینه‌.