سەربەست ئامێدی: دەمێ دیاركرنا ھەلبژارتنێن ھەرێمێ نه‌یێ گونجایه‌

ئاژانسا خانی”تایبەت:

شارەزایەکێ ھەلبژارتنان ئاشکرا کر، دیارکرنا دەمێ ئه‌نجامدانا ھەلبژارتنێن پەرلەمانێ کوردستانێ  ل رۆژا ١٨ی شواتا سالا بهێت نه‌یێ گونجایە و دەستپێکا سالا بهێت دێ دەمێ قانوونییێ کۆمسیۆنا ھەلبژارتنێن عێراقێ بسەرڤە چیت.

سەربەست ئامێدی شارەزایێ ھەلبژارتنان بۆ ئاژانسا خانی دیار کر” ئەڤرۆ کۆمسیۆنا ھەلبژارتنێن عێراقێ پێشنیار کرییە رۆژا ١٨ی شواتا سالا بهێت ھەلبژارتنێن ھەرێما کوردستانێ بھێنە ئەنجامدان، بەلێ ئەو دەمێ ھاتییە دیارکرن نه‌یێ گونجایە و کۆمسیۆن نەشێت ھەلبژارتنان بڕێڤە ببەت، چونکی ل رۆژا ٧/١/٢٠٢٤ ێ دێ دەمێ قانوونییێ کۆمسیۆنا ھەلبژارتنێن عێراقێ تەمام بیت و نەشێت ھەیڤا لدووڤدا ھەلبژارتنان بڕێڤە ببەت.

سەربەست ئامێدی گۆت ژی” ژییێ جڤاتا کۆمسیاران ب تنێ چار سالن و نەشێن زێدەتر کار بکەن، دەمەکی دێ کۆمسیۆن شێت ١٨ی شواتێ ھەلبژارتنێن ھەرێما کوردستانێ بڕێڤە بەت و تەمەنێ کۆمسیۆنێ بھێتە درێژکرن ئەڤە ژی کارەکێ ب زەحمەتە و ناھێتە کرن، ئەز باوەرم کۆمسیۆنێ ب ئاشکرا نەگۆتیە نەشێین ھەلبژارتنێن ھەرێمێ بڕێڤە ببەین، بەلێ ب شێوەیەکی دی ئەو ژڤان دیارکرییە ئۆتۆماتیکی نەشێت وی دەمێ ھاتییە دیارکرن بڕێڤە ببەت.