كۆمیسیۆنا هه‌لبژارتنێن عیراقێ 250 هزار ده‌رفه‌تێن كارى راگه‌هاندن

كۆمیسیۆنا بلندا سه‌ربه‌خۆ یا هه‌لبژارتنێن عیراقێ دێ 250 هزار كه‌سان بۆ سه‌رپه‌رشتیكرنا هه‌لبژارتنێن جڤاتێن پارێزگه‌هان وه‌رگریت.

كۆمیسیۆنا بلندا سه‌ربه‌خۆ یا هه‌لبژارتنێن عیراقێ ده‌رگه‌هێ پێشكێشكرنا داخوازكرنێ بۆ سه‌رپه‌رشتیكرنا هه‌لبژارتنێن جڤاتێن پارێزگه‌هان ڤه‌كر، كو فه‌رمانبه‌ر و ده‌رچوویێن زانكۆ و په‌یمانگه‌هان ب خۆڤه‌دگریت.

جۆمانه‌ غه‌لاى په‌یڤدارا كۆمیسیۆنا بلندا سه‌ربه‌خۆ یا هه‌لبژارتنێن عیراقێ راگه‌هاند، ئه‌و ده‌رفه‌ته‌ 250 هزار كه‌سان بخۆڤه‌دگریت، كو دێ وه‌ك كارمه‌ند بۆ هه‌لبژارتنێن جڤاتێن پارێزگه‌هان كاركه‌ن، پێدڤییه‌ ل سنۆرێ وان 15 پارێزگه‌هان بن یێن هه‌لبژارتن تێدا دهێنه‌كرن.

سه‌باره‌ت شێوازێ وه‌رگرتنا ئه‌وان كارمه‌ندان غه‌لاى گوت: هه‌تا نوكه‌ ئه‌و چه‌نده‌ نه‌هاتییه‌ ئێكلاكرن كا دێ ب هه‌ڤبه‌ست بن یان هه‌رده‌مى و مووچه‌یێ وان دێ چه‌ند بیت، ئه‌و دێ دووڤدا ب رێنمایان هێنه‌ راگه‌هاندن.

ل دووڤ رێنمایێن كۆمیسیۆنێ، ئه‌و كه‌سێن داخوازان پێشكێش دكه‌ن، نابیت ژ 19 سالییێ كێمتر بن و ژ 56 سالییێ زێده‌تر بن.